Tags-Ishq

apnī ḳhabar kahāñ unheñ jin pe khulā hai rāz-e-ishq
saare shu.ūr miT ga.e jab huā imtiyāz-e-ishq

hosh-o-ḳhirad bhī al-firāq ''bainī-va-bainaka'' kaheñ
hazrat-e-dil kā ḳhair se hai safar-e-hijāz-e-ishq

pīr-e-muġhāñ ke pā-e-nāz aur mirā sar-e-niyāz
hotī hai mai-kade meñ roz apnī yūñhī namāz-e-ishq

hasrat-o-yās-o-ārzū shauq kā iqtidā kareñ
kushta-e-ġham kī laash par dhuum se ho namāz-e-ishq

ishq kī zaat hī se hai ḳhūbī-e-husn-o-shān-e-husn
husn ke dam-qadam se hai saarā ye soz-o-sāz-e-ishq

ai dil-e-dardmand phir naala ho koī dil-gudāz
suunī paḌī hai bazm-e-shauq chheḌ de apnā sāz-e-ishq

hosh-o-ḳhirad adū-e-ishq ishq hai dushman-e-ḳhirad
hai na huā na ho kabhī aql se sāz-bāz-e-ishq

'bedam'-e-ḳhasta hai kahāñ asl meñ koī aur hai
zamzama-sanj be-ḳhudī naġhma-tarāz sāz-e-ishq

maiñ rāz-e-ishq ko rusvā karūñ ma.āz-allāh
ye baat aur hai dil par na iḳhtiyār rahe

ishq apnī jagah magar ham ne
muntaḳhab aur hī Dagar kī hai

ek to ishq kī taqsīr kiye jaatā huuñ
us pe maiñ pairvī-e-'mīr' kiye jaatā huuñ

ḳhumār hasrat-e-dīdār meñ rahūñ har dam
savād-e-ishq yūñhī terī shiddatoñ meñ rahūñ

ḳhudā kā shukr ki aahaT se ḳhvāb TuuT gayā
maiñ apne ishq meñ nākām hone vaalā thā

e'tibār-e-ishq kī ḳhāna-ḳharābī dekhnā
ġhair ne kī aah lekin vo ḳhafā mujh par huā

ishq-e-butāñ meñ jab dil uljhā diin kahāñ islām kahāñ
vaa.iz kaalī zulf kī ulfat sab ko raam banā.egī

ye ātish-e-ishq kī hai jiddat ki dil meñ paidā huī hai riqqat
ye soz-e-ġham kī milī hai lazzat maza hai dil kī jalan ke andar

fikr hai shauq-e-kamar ishq-e-dahāñ paidā karūñ
chāhtā huuñ ek dil meñ do makāñ paidā karūñ

pahlī sī lazzateñ nahīñ ab dard-e-ishq meñ
kyuuñ dil ko maiñ ne zulm kā ḳhūgar banā diyā

dayār-e-ishq kī tīra-nasībiyāñ 'sālim'
ki āsmāñ to gire ḳhuub abr kam utrā

ġhuncha-e-zaḳhm-e-jigar khil ke dikhā dete haiñ
chaman-e-ishq sanam kā gul-e-ḳhandāñ mujh ko