Tags-Ishq

dekhiyo sābit-qadamī qais kī
ishq meñ kyā umr basar kar gayā

ishq pe bul-havasī kā ta.an ye bhī koī baat huī
koī ġharaz to hotī hai pyaar se har īsār ke biich

ye hai dayār-e-ishq yahāñ 'kaif' ḳhirad se kaam na le
farq nahīñ kar pā.egā majnūñ o hoshyār ke biich

maslahat-kesh bane baiThe haiñ sab ahl-e-vafā
itnā rusvā to kabhī ishq kā pindār na thā

ishq jis kūche meñ rahtā hai vo kūcha hai bahisht
aql jis duniyā meñ rahtī hai vo duniyā kuchh nahīñ

itnā to jazb-e-ishq ne baare asar kiyā
us ko bhī ab malāl hai mere malāl kā

junūn-e-ibtidā-e-ishq ne karvaT sī lī dil meñ
pas-az muddat ye le ke aa ga.ī phir apne muhmal meñ

sharārat kā ye nazzāra mirī hairat kā sāmāñ thā
ki is parda ke andar terā rāz-e-ishq uryāñ thā

jin se zinda ho yaqīn o āgahī kī aabrū
ishq kī rāhoñ meñ kuchh aise gumāñ karte chalo

ishq meñ ashk jo bahāte ho
aag paanī ko tum milāte ho

maiñ kaise maan luuñ ki ishq bas ik baar hotā hai
tujhe jitnī dafa dekhūñ mujhe har baar hotā hai

agar hai ishq sachchā to nigāhoñ se bayāñ hogā
zabāñ se bolnā bhī kyā koī iz.hār hotā hai

jise na husn se matlab na ishq se sarokār
vo shaḳhs mujh ko bahut bad-nasīb lagtā hai

ye māhtāb nahīñ hai ki āftāb nahīñ
sabhī hai husn magar ishq kā javāb nahīñ

ye kahe zamāna javāñ hai to qadam aisā mard-e-javāñ uThā
jo na bār-e-ishq uThā sake to balā se teġh-o-sināñ uThā

jo hue farishtoñ meñ mashvare kare kaun ishq kī raah tai
kamar apnī bāñdh ke jo uThā to 'jigar' sā mard-e-javāñ uThā

ishq vo mashk hai jo laakh chhupā.e na chhape
daaġh ham se bhī mohabbat ke lagā.e na chhape

karte haiñ ġhalat yaar se iz.hār-e-vafā ham
sābit jo huā ishq kujā yaar kujā ham

ye aarzū ki mere ishq ko mile me.arāj
namāz-e-ishq paḌhūñ hijr-e-be-karāñ dekhūñ

ye hai ahl-e-zarf kī anjuman ye hai ahl-e-ishq kā mai-kada
tū hazār nashshe meñ chuur ho jo yahāñ pe aa to sambhal ke aa