Tags-Ishq

ye junūn-e-ishq kī shaan hai tujhe log kuchh bhī kahā kareñ
jo atā-e-kū-e-habīb hai vahī ḳhaak chehra pe mal ke aa

ye dard-o-ġham-e-ishq dilā jaan ġhanīmat
pahuñchī tirī hub se tujhe ahbāb kī mīrās

ġhalat ki qābil-e-dār-o-rasan hoñ ahl-e-havas
bañdhā.ī ishq ne himmat jise vo mard huā

tamām tajraba-e-garm-o-sard-e-ishq kahāñ
kuchh ashk-e-garm huā dil kuchh āh-e-sard huā

karam se apne miTā do ki be-qarār hai ishq
mirā vajūd ki duniyā ke dil kā dard huā

rivāj-e-ishq ke aa.iiñ vahī haiñ kishvar-e-dil meñ
rah-o-rasm-e-vafā jaarī jo aage thī so ab bhī hai

jāma-zebī pe tirī varna lagegā ilzām
ishq ke paikar-e-uryāñ ko ravā.eñ denā

yaksāñ hai husn-o-ishq kī sar-mastiyoñ kā rañg
un kī ḳhabar unheñ hai na merī ḳhabar mujhe

ham ishq ke māroñ kā itnā hī fasānā hai
rone ko nahīñ koī hañsne ko zamānā hai

kirshn 'mohan' tab.a par taarī hai aisī be-hisī
ishq hai jī kā ziyāñ aur husn hai jaañ kā vabāl

TukḌe hue the dāman-e-hastī ke jis qadar
dalq-e-gadā-e-ishq ke paivand ho ga.e

sub.h-e-firāq al-amāñ vasl kī shaam al-amāñ
ajiib hai bisāt-e-ishq ajab nizām al-amāñ

saarī talāsh hai abas saarī talab hai rā.egāñ
kār-e-fuzūl ishq meñ sab kuchh tamām al-amāñ

husn hai ishq-e-āfrīñ husn pe dil luTā.e jā
ishq ko dard-e-dil banā dard ko dil banā.e jā

husn se baḌh ke bad-gumāñ ishq hai apne aap se
maiñ abhī mutma.in nahīñ tū mujhe āzmā.e jā

husn hai mahz jafā ishq hai tasvīr-e-vafā
rabt kā kuchh to sabab mujh ko batā.e koī

ab kise hai dimāġh-e-tohmat-e-ishq
kaun suntā hai baat phūloñ kī

vahī to haiñ bas zinda-dār-e-mohabbat
tire ishq ke jo haiñ maare kanhaiyā

ishq kī hai ye kaun sī manzil
gaah jiitā huuñ gaah martā huuñ