Tags-Ishq

mire ustād ko firdaus-e-a.alā meñ mile jaagā
paḌhāyā kuchh na ġhair-az-ishq mujh ko ḳhurd-sālī meñ

ḳharābī ishq se rahtī hai dil par aur nahīñ rahtā
nihāyat aib hai ye is dayār-e-ġham ke vaalī meñ

āvegī merī qabr se āvāz mere ba.ad
ubhreñge ishq-e-dil se tire raaz mere ba.ad

'riyāz' ishq meñ kāfir butoñ ke hai be-ḳhud
mazā ye hai vo use pārsā samajhte haiñ

dā.era-vār hī to haiñ ishq ke rāste tamām
raah badal rahe haiñ aap aap bahut ajiib haiñ

koī kartā hī nahīñ zikr vafādārī kā
in dinoñ ishq meñ āsānī hī āsānī hai

batā ai ḳhizr rāh-e-ishq meñ manzil hai aisī bhī
kahīñ ham vāqif-e-asrār-e-jānāñ ho bhī sakte haiñ

ba-pās-e-ehtirām-e-ishq ham ḳhāmosh haiñ varna
pareshāñ kar bhī sakte haiñ pareshāñ ho bhī sakte haiñ

kyā huī vo diloñ kī māsūmī
husn rūThā na ishq pachhtāyā

dil markaz-e-hijāb banāyā na jā.egā
un se bhī rāz-e-ishq chhupāyā na jā.egā

sar milā hai ishq kā saudā samāne ke liye
āñkheñ diiñ insān ko aañsū bahāne ke liye

ishq meñ kab ye zarūrī hai ki royā jaa.e
ye nahīñ dāġh-e-nadāmat jise dhoyā jaa.e

saf.ha-e-rozgār par likh likh
ishq kī dāstān chhoḌ ga.e

qaus-e-abrū ḳham-e-gesū shikan-e-peshānī
aaj bhī ishq ke pechīda masā.il to nahīñ

ishq 'amabar' vo be-qarārī hai
lagtī hai aur baḌhtī jaatī hai

mujh se un āñkhoñ ko vahshat hai magar mujh ko hai ishq
khelā kartā huuñ shikār āhū-e-sahrā.ī kā

hākim-e-ishq ne jab aql kī taqsīr sunī
ho ġhazab hukm diyā des nikālā karne

karo kaj jabīñ pe sar-e-kafan mire qātiloñ ko gumāñ na ho
ki ġhurūr-e-ishq kā bāñkpan pas-e-marg ham ne bhulā diyā

ishq hai to yuuñ nibhānā chāhiye
jaan par ab jaan jaanā chāhiye

ma.azarat yaar nayā ishq nahīñ ho saktā
dil mayassar hai na siine kī jagah ḳhālī hai