Tags-Ishq

shā.irī kyā hai 'amīn-ashraf' navā-e-barg ne
ishq-nāma bhī ġhazal bhī āsmāñ mehrāb bhī

sharar-e-garm ishq par jal ke
dil ne ispand-vār kī fariyād

hasrat-e-shahr-e-nasībāñ kyā tujhe ma.alūm bhī hai
dasht hai ābād ya.anī ishq ke ghar se ziyāda

ishq ne mere jise alqāb kā daftar diyā
us ne sone ko mujhe kāñToñ bharā bistar diyā

ishq hī phir palaT ke aa na sakā
husn-e-maġhrūr ne pukārā bhī

dil ko miTā ke dāġh-e-tamannā diyā mujhe
ai ishq terī ḳhair ho ye kyā diyā mujhe

maiñ aur ārzū-e-visāl-e-parī-ruḳhāñ
is ishq-e-sāda-lauh ne bahkā diyā mujhe

allāh re teġh-e-ishq kī barham-mazāhiyāñ
mere hī ḳhūn-e-shauq meñ nahlā diyā mujhe

ishq hai sāda-o-māsūm use apnī tarah
jauhar-e-teġh-e-adā ḳhanjar-e-ayyārī de

hamārī zindagī par hai hamāre ishq kā saaya
ki ham jo kaam karte haiñ ḳhasārā hone lagtā hai

zamīn o āsmāñ ke saare sahrā raqs karte haiñ
kisī par ishq jab bhī āshkārā hone lagtā hai

har kā.enāt se ye alag kā.enāt hai
hairat-sarā-e-ishq meñ din hai na raat hai

ye mushagāfiyāñ haiñ girāñ tab-e-ishq par
kis ko dimāġh-e-kāvish-e-zāt-o-sifāt hai

toḌā hai lā-makāñ kī hadoñ ko bhī ishq ne
zindān-e-aql terī to kyā kā.enāt hai

gum ho ke har jagah haiñ za-ḳhud raftagān-e-ishq
un kī bhī ahl-e-kashf-o-karāmāt zaat hai

maiñ ne sarf kar dī hai zindagī tirī manziloñ kī talāsh meñ
tujhe DhūñDhtā na phirā kahāñ mire ishq kā tū sarāb hai

tū jo talvār se nahlā.e lahū meñ mujh ko
ġhusl-e-sehhat huā bhī ishq kī bīmārī se

bulbul kī ḳhush-navā.ī kā baa.is hai ishq-e-gul
dil meñ jo dard hai to maza bhī suḳhan meñ hai

vo kyā hai ishq ham ne ab kī jānāñ
takalluf meñ ziyāda kar liyā hai

ishq meñ de ke jaañ huī ye ḳhabar
aa gayā kuchh diyā liyā aage