Tags-Ishq

ḳhuub roz-e-talab haiñ aur hameñ
ḳhaar rakhtā hai muflisī kā ishq

apne mausam meñ kaisā hotā hai
naunihāloñ ko sar-kashī kā ishq

'mus.hafī' ik ġhazal tū aur bhī likh
gar tujhe hai raqam-zanī kā ishq

āñkhoñ meñ haiñ mahfūz tire ishq ke lamhāt
dariyā ko ḳhayāl-e-ḳhas-o-ḳhāshāk bahut hai

nasīhat mujh ko tark-e-ishq kī kuchh farz nahīñ tujh par
na chhoḌ ai shaiḳh sunnat muñh meñ nit misvāk rahne de

kaun jaane ki ishq meñ kitne
apnī miTTī palīd kar baiThe

kāfir-e-ishq samajh kar ham ko kitne tūfāñ uThte haiñ
dil kī baat ko kis se kah deñ bastī hai dīñ-dāroñ kī

maiñ tark-e-ishq ko kahtā huuñ 'mus.hafī' tujh se
ye baat dhyān meñ tere magar nahīñ aatī

ajiib taur haiñ ab kār-gāh duniyā ke
ġhurūr-e-ishq javāz-e-hunar nahīñ miltā

ye said-gāh-e-ishq hai Thahrā.iye nigāh
sayyād-e-muztarib se na hogā shikār dil

tāsīr-e-ishq ye hai tire ahd-e-husn meñ
miTTī kā bhī banā.eñ to ho be-qarār dil

ai andalīb tujh ko lage kab havā-e-ishq
kaliyoñ kī tarah tujh meñ na phūTe hazār dil

garmi-e-ishq nigāhoñ meñ nahīñ hai na sahī
muskurātī huī āñkhoñ meñ hayā aaj bhī hai

husn pāband-e-qafas ishq asīr-e-ālām
zindagī jurm-e-mohabbat kī sazā aaj bhī hai

hasrateñ ziist kā sarmāya banī jaatī haiñ
sīna-e-ishq pe vo mashq-e-jafā aaj bhī hai

vafā ke jurm meñ aksar pukāre jaate haiñ
ham ahl-e-ishq mohabbat meñ maare jaate haiñ

ishq kī sharah-e-muḳhtasar ke liye
sil ga.e hoñT umr-bhar ke liye

abr-e-rahmat hai ishq kā dāman
ātish-e-razm ḳhair-o-shar ke liye

aql samghā.egī dil lagtī dalīleñ de kar
phir bhī hargiz na kabhī ishq dobāra karnā

maiñ abhī ishq nahīñ hālat-e-īmān meñ huuñ
jañg karte hue asbāb nahīñ bhūltā maiñ