Tags-Ishq

ishq meñ har qadam hai ik manzil
rāh-e-ulfat kī mushkilāt na pūchh

jism meñ ḳhuuñ kī ravānī kā maza aa.egā
ishq hote hī javānī kā maza aa.egā

hamīñ haiñ jinheñ ishq hai bāñkpan se
hamīñ haiñ jo uljheñ haiñ dār-o-rasan se

hai to 'nairañg' vahī ishq kā ronā-dhonā
inhī bātoñ meñ nayā rañg dikhā jaate ho

hamāre ishq kā koī gavāh zinda nahīñ
azāb-e-hijr thā ab vo bhī darmiyāñ na rahā

aañkh se hijr girā dil ne duhā.ī dī hai
ishq vāloñ kī kahāñ chīḳh sunā.ī dī hai

ishq un zulfoñ kā mujh se tark hone kā nahīñ
hai mirā ham-zād ai nāseh ye joḌā saañp kā

ishq meñ gesū o abrū ke agar denī hai jaan
nīsh-e-aqrab khā ke pī le zahr thoḌā saañp kā

ishq-e-gesū meñ na qatra bhī talaf hone diyā
zahr saarā halaq meñ maiñ ne nichoḌā saañp kā

vahāñ zer-e-bahs aate ḳhat-o-ḳhāl o ḳhū-e-ḳhūbāñ
ġham-e-ishq par jo 'anvar' koī seminar hotā

liyā ishq meñ jog bhikārī bane tire naqsh-e-qadam ke pujārī bane
kabhī sajde kiye kabhī gird phire but sīm-bare zarrīñ-kamre

tujhe kuchh ishq o ulfat ke sivā bhī yaad hai ai dil
sunā.e jā rahā hai ek hī afsāna barsoñ se

sabab kyā pūchhte ho ishq kī āshufta-hālī kā
divāna hai kisū dilbar kī vaz-e-lāubālī kā

kiyā huuñ ishq meñ tārīf us mah-rū ke abrū kī
har ik misra.a hai merā rashk dīvān-e-hilālī kā

garmi-e-ishq ne baḳhshā hai ye aalam varna
husn bedār na thā merī nazar se pahle

lazzat dard farishtoñ ko 'razā' kyā ma.alūm
na huā ishq kā āzār bashar se pahle

ghuTan taḌpan udāsī ashk rusvā.ī akelā-pan
baġhair in ke adhūrī ishq kī har ik kahānī hai

kisī ke ishq kā naġhma hamāre lab pe bhī gūñje
koī to naam le kar ab hamārā bhī pukārā ho

junūn-e-ishq meñ 'īmāñ' faqat itnā parakh lenā
jise jugnū samajhtī huuñ ḳhabar kyā vo sharārā ho

ilaaj karte haiñ saudā-e-ishq kā mere
ḳhalal-pazīr huā hai dimāġh yāroñ kā