Tags-Ishq

harīm-e-ishq ke pardoñ se lau nikaltī hai
ye soz-o-sāz hai kis naġhma-e-rabāb kī aañch

hazāroñ Thokareñ har ik qadam par us meñ haiñ
ye rāh-e-ishq hai kyuuñ kar koī sambhal ke chale

is liye duble hue jaate haiñ sab ahl-e-ishq
khānā-pīnā na rahe chain se sonā ruk jaa.e

zindagī aur pur-asrār huī jaatī hai
ishq kā saath na hotā to shikāyat bhī na thī

mar miTe log sar-e-rah-guzar-e-ishq 'fuzail'
apne hisse meñ ye chhoTī sī sa.ādat bhī na thī

ishq ke hāthoñ ye saarī ālam-ārā.ī huī
ishq ke hāthoñ qayāmat bhī hai ab aa.ī huī

lazzat hanūz mā.ida-e-ishq meñ nahīñ
aatā hai lutf-e-jurm-e-tamannā sazā ke ba.ad

laġhzisheñ merī musallam ibtidā-e-ishq meñ
aap ko bhī kuchh ḳhabar thī aap ko bhī hosh thā

ishq kā e.ajāz thā ye ishq kī tāsīr bhī
dil se jo naala nikaltā thā sukūn-e-gosh thā

hazrat-e-ishq ne donoñ ko kiyā ḳhāna-ḳharāb
barhaman but-kada aur shaiḳh haram bhuul ga.e

koī muzā.iqa nahīñ piirī ke ishq meñ
vaise bhī ye savāb kamāne kī umr hai

tum yūñhī ishq ke zor par ḳhud ko rakkhe raho aur hañste sañvarte raho
dekhnā ek din ham kisī moḌ par apne ham-zād ko zer kar jā.eñge

bahut chhoTā sahī ye dil magar 'anjum' ye mumkin hai
tavāzun ishq kā ab to yahī pasañg badlegā

raḳhna tarīq-e-ishq meñ Daalā jo hijr ne
nāsūr dil kā rauzan-e-dīvār ho gayā

ishq-e-sanam gale kā mire haar ho gayā
gardan kā taar rishta-e-zunnār ho gayā

ab tak hai vahī silsila-e-ḳhāna-ḳharābī
ai ishq-e-sitam-pesha tirī umr baḌī hai

maiñ āshiq huuñ badal Daalā mujhe ishq-o-qanā.at ne
ujālā dil meñ thā duniyā mirī Thokar pe rakkhī thī

ye zamīnī bhī hai zamānī bhī
fitrat-e-ishq āsmānī bhī

hātif-e-ishq to kahtā hai idhar sab kuchh hai
ālam-e-yās ye kahtā hai udhar kuchh bhī nahīñ