Tags-Ishq

ishq kī bū thī tajassus kā nasha shauq kā rañg
sāġhar-e-gul meñ tire vāste Dhāle ga.e ham

pīchhā kisī tarah ye mirā chhoḌtā nahīñ
hāthoñ se ishq ke koī jaave kahāñ nikal

junūn-e-be-sar-o-sāmāñ kī zīnat dekhne vaale
mabādā farq aa.e ishq kī tadbīr-e-manzil meñ

husn ho yā ishq hotī hai burī dil kī lagī
jal-bujhī ro ro ke āḳhir sham.a parvāne ke ba.ad

ishq kī tārīḳh dohrā.ī zamāne ne zarūr
naam paayā qais ne bhī tere dīvāne ke ba.ad

pas-e-dafn bhī na sukūñ milā tah-e-ḳhāk hasrat-e-ishq ko
kabhī sabza ban ke lahak uThī kabhī phuul ban ke mahak ga.ī

kyā haqīqat kahūñ ki kyā hai ishq
haq-shanāsoñ ke haañ ḳhudā hai ishq

dil lagā ho to jī jahāñ se uThā
maut kā naam pyaar kā hai ishq

aur tadbīr ko nahīñ kuchh daḳhl
ishq ke dard kī davā hai ishq

kyā Dubāyā muhīt meñ ġham ke
ham ne jaanā thā āshnā hai ishq

ishq se jā nahīñ koī ḳhālī
dil se le arsh tak bharā hai ishq

kohkan kyā pahāḌ kāTegā
parde meñ zor-āzmā hai ishq

ishq hai ishq karne vāloñ ko
kaisā kaisā baham kiyā hai ishq

kaun maqsad ko ishq bin pahuñchā
aarzū ishq mudda.ā hai ishq

'mīr' marnā paḌe hai ḳhūbāñ par
ishq mat kar ki bad balā hai ishq

avval-e-ishq hī meñ kyā dil kā ma.aal dekhnā
ye to hai ibtidā-e-soz aag abhī lagī nahīñ

ishq hai kaif-e-be-ḳhudī is ko ḳhudī se kyā ġharaz
jis kī fazā ho vasl o hijr ishq vo ishq hī nahīñ

kar na sukūn-e-dil kā ġham hādi-e-mubtalā zarā
ishq kī bārgāh meñ dard kī kuchh kamī nahīñ

ishq se ijtināb kar lenā
apnī miTTī ḳharāb kar lenā

samajh sakegā vo kyā mere dil kī betābī
huā na jis ko kabhī soz-e-ishq yaar nasīb