Tags-Ishq

ishq ko hausla hai shart arna
baat kā kis ko Dhab nahīñ aatā

duur baiThā ġhubār-e-'mīr' us se
ishq bin ye adab nahīñ aatā

ye mulāqāt luuTe letī hai
ishq kī ghaat luuTe letī hai

the ba-faiz-e-ishq ham bhī yūsuf-e-bāzār-e-misr
lauT kar jaate kahāñ shahr-e-zuleḳhā dekh kar

ishq kī jot jagāne meñ baḌī der lagī
saa.e se dhuup banāne meñ baḌī der lagī

ishq meñ dil kā ye manzar dekhā
aag meñ jaise samundar dekhā

gulāb kī kalī 'sīmā' nikhrī hai jab
tumhāre ishq kī shabnam kī buuñd pī maiñ ne

jo sambhal sambhal ke bahak ga.e vo fareb-ḳhurda-e-rāh the
vo maqām-e-ishq ko pā ga.e jo bahak bahak ke sambhal ga.e

us din se apne bulbul-e-dil ko hai ishq-e-gul
gulzār-e-dahr meñ huī jaise binā-e-bāġh

mujhe ḳhabar hī nahīñ thī ki ishq kā āġhāz
ab ibtidā se nahīñ darmiyāñ se hotā hai

naġhma-e-ishq sunātā huuñ maiñ is shaan ke saath
raqs kartā hai zamāna mire vijdān ke saath

na ḳhvāhish hai gadā.ī kī na hai armān shāhī kā
ilāhī ishq de bande ko mahbūb-e-ilāhī kā

jab se kahā ishq ne 'hasrat' mujhe
koī bhī kahtā nahīñ fazl-ul-hasan

ishq hī puurī tarah kar leñ to samjho koī jihād kiyā hai
ye 'farhat-ehsās' azal ke kāhil kyā koī kaam kareñge

jaan se ushshāq jaate haiñ guzar kaTte haiñ ġhair
pul-sirāt-e-imtihān-e-ishq kahlātī hai teġh

kuchh aag dī havas meñ to tāmīr-e-ishq kī
jab ḳhaak kar diyā use irfāñ banā diyā

ik barq thī zamīr meñ fitrat ke maujzan
aaj us ko husn o ishq kā sāmāñ banā diyā

tirā ishq hai mirī zindagī tire husn pe maiñ nisār huuñ
tirā rañg aañkh meñ bas gayā tirā nuur dil meñ utar gayā

kyā ḳhabar thī ishq bhī ik rog hai
varna kāfir dil ko de detī lagām

husn-o-ishq kī laag meñ āḳhir kis ko mujrim Thahrā.eñ
dil kā dāman chaak huā ho aisā bhī ho saktā hai