Tags-Ishq

kabhī to ishq meñ un ke sadāqat aa hī jā.egī
kabhī to un ke dil meñ merī chāhat aa hī jā.egī

ishq ko pās-e-vafā aaj bhī karte dekhā
ek patthar ke liye jī se guzarte dekhā

ifshā-e-rāz-e-ishq meñ go zillateñ huiiñ
lekin use jatā to diyā jaan to gayā

hayāt-e-ishq kī ḳhurshīd-sāmānī nahīñ jaatī
miTā jaatā hai dil zarroñ kī tābānī nahīñ jaatī

namāz-e-ishq hai TuuTe diloñ kī dildārī
mire aziiz na is ko kabhī qazā kiyā kar

kyā jānūñ ishq kyā hai lekin kisī ne 'ehsāñ'
ik aag kā sā sho.ala dil ko lagā diyā hai

dil jalā āñkheñ jalīñ jī jal gayā
ishq ne kyā kyā hameñ dikhlā.e daaġh

be-sabab ishq kab udaas rahā
vo tumhārā adā-shanās rahā

zindagī-bhar ḳhudī kā paas rahā
ishq kab mahv-e-iltimās rahā

jāma-zebī ba-qadr-e-zauq rahī
ishq har shaḳhs kā libās rahā

maraz-e-ishq se 'bīmār' jo ghabrātā hai
yaar kahtā hai mujhe ḳhuub davā aatī hai

tum na maano magar haqīqat hai
ishq insān kī zarūrat hai

ishq vo chaar sū safar hai jahāñ
koī bhī rāsta nahīñ ruktā

kab ahl-e-ishq tumhāre the is qadar gustāḳh
unheñ tumhīñ ne kiyā chheḌ chheḌ kar gustāḳh

ham bāda-o-jām ke parde meñ kuchh rāz-e-junūñ kah jaate haiñ
jab ishq kā nashsha chaḌhtā hai maḳhmūr tabī.at hotī hai

mohabbat meñ ziyāñ-kārī murād-e-dil na ban jaa.e
ye lā-hāsil hī umr-e-ishq kā hāsil na ban jaa.e

nairañg-e-ishq kī hai koī intihā ki ye
ye ġham kahāñ kahāñ ye masarrat kahāñ kahāñ

ab imtiyāz-e-ishq-o-havas bhī nahīñ rahā
hotī hai terī chashm-e-ināyat kahāñ kahāñ

zamīn us ke liye tañg hotī jā.egī
ḳhudā-e-ishq ko jo be-vuzū pukāregā

har saañs hai sharh-e-nākāmī phir ishq ko rusvā kaun kare
takmīl-e-vafā hai miT jaanā jiine kī tamannā kaun kare