Tags-Izhar

kabhī maiñ jur.at-e-iz.hār-e-mudda.ā to karūñ
koī javāz to ho lutf-e-be-sabab ke liye

bos-o-kanār ke liye ye sab fareb haiñ
izhār-e-pāk-bāzī-o-zauq-e-nazar ġhalat

kis se iz.hār-e-mudda.ā kiije
aap milte nahīñ haiñ kyā kiije

tamannā dil kī 'sāqī' jab nikaltī
agar muñh se na kuchh iz.hār hotā

hamārā farz hai be-lāg raa.e kā iz.hār
koī durust kahe yā ġhalat ye kaam us kā

apnī kuchh bāteñ dar-e-iz.hār tak aane na diiñ
band kamre hī meñ dil ko chīḳhtā rahne diyā

merī nafrat bhī hai sheroñ meñ mire pyaar ke saath
maiñ ne likkhī hai ġhazal jur.at-e-iz.hār ke saath

koī iz.hār-e-ġham-e-dil kā bahāna bhī nahīñ
ho bahāna bhī jo koī to zamāna bhī nahīñ

zarā bhī kaan dhar kabhū na sune
dard-e-dil ham agar kareñ iz.hār

lafz likhnā hai to phir kāġhaz kī niyyat se na Dar
is qadar iz.hār kī be-ma.anaviyyat se na Dar

to vo andāz jaise merā ghar paḌtā ho raste meñ
pa.e-iz.hār-e-hamdardī vo jab tashrīf laa.e haiñ

ye na samjho ki kisī dard ke iz.hār meñ thī
aarzū vaqt ke TuuTe hue pindār meñ thī

paikar-e-sher meñ Dhal jaa.e kisī kā chehra
mere iz.hār-e-mohabbat kā ye me.aar nahīñ

koī pairāya-e-iz.hār to ho
chup haiñ alfāz to dhaḌkan bole

ishq iz.hār kā tālib hai na matlūb-e-nazar
fā.eda kyā hai miyāñ sho.ala-bayānī kar ke

ham bhī zinda haiñ ajab kāvish-e-iz.hār ke saath
guftugū karte haiñ ghar ke dar-o-dīvār ke saath

husn-e-insāñ se fitrat kī sargoshiyāñ ghul ga.iiñ tere lahje kī jhankār meñ
fan kī takmīl sachchā sarāpā tirā, be-zabānī ko laayā jo iz.hār meñ

koī iz.hār kar saktā hai kaise
ye lafzoñ se zabāñ kā fāsla hai

pa.e-iz.hār kuchh aisā nahīñ hai jo anokhā ho
har ik jazba purānā hai har ik ehsās baasī hai