Tags-Jabr

muḳhtār huuñ ki mo'tarif-e-jabr-e-dost huuñ
majbūr huuñ ki ye bhī koī iḳhtiyār hai

gardish-e-vaqt kā ye jabr hai shāyad jo log
sub.h zinda haiñ magar shaam ko mar jaanā hai

saarī kaḌiyāñ toḌ diiñ maiñ ne mohabbat ke sivā
kaun toḌegā ise ye jabr to andar kā hai

satvat-e-jabr vahī rañg kī dīvār vahī
ek ehsās hai jo mujh se sivā hai mujh meñ

ik jabr-e-musalsal hai anāsir kī kahānī
muḳhtār kahe jaate the jab nikle the ghar se

aur phir shāḳhoñ se talvāreñ baras paḌtī haiñ
jabr jaag uThtā hai saffākī javāñ hotī hai

har shaḳhs ahd-e-jabr meñ harf-e-duā huā
hoñToñ ko hādsāt ne kyā kyā hunar diye

apne tābūt meñ ḳhud se haibat-zada jabr kī zindagānī meñ jiitā rahā
yuuñ jamāl-e-sahar zard sūraj ke hāthoñ meñ girvī rahā

kab talak aañkh na kholegā zamāne kā zamīr
zulm aur jabr kī ye riit chalegī kab tak

jabr se nasl baḌhe zulm se tan mel kareñ
ye amal ham meñ hai be-ilm parindoñ meñ nahīñ

ek vo hī shaḳhs mujh ko ab gavāra bhī nahīñ
jabr ye us ke sivā apnā guzāra bhī nahīñ

ho kaise jabr-e-mashiyat ko is duā kā lihāz
jo ek baar mile phir kabhī judā hī na ho

'fānī' tire amal hama-tan jabr hī sahī
sāñche meñ iḳhtiyār ke Dhāle hue to haiñ

nigāh-o-lab meñ hañsī kī sakat nahīñ lekin
ba-jabr-e-ishq-o-vafā muskurā rahā hai koī

mohabbat kahāñ ye to bechārgī hai sitam bhī saheñ phir karam is ko samjheñ
ye jabr is liye kar liyā hai gavārā ki is ke sivā koī chārā na dekhā

jabr-e-mujrimāna se tū chaman pe qābiz hai ab bhī tasfiya kar le
varna gulsitāñ terā kal jahāñ ke naqshe par sar kaTā mubārak ho

tū ne jin bechāroñ ke kam-sinoñ kī lāshoñ par pā-e-taḳht rakkhe haiñ
un ke jism-e-uryāñ par tere jabr-e-be-jā kā dabdaba mubārak ho

tamām jabr-o-tashaddud kī had bhī ḳhatm huī
ki jab se sabr ko mehvar banā diyā ham ne

jabr aur zulm kī buniyād ko Dah kar bahno
aao ab himmat-e-mardāna ko hairāñ kar deñ

agarche jabr hai ye bhī magar ġhanīmat jaan
ki ek jazba-e-be-iḳhtiyār de to diyā