Tags-Jabr

ab na kabhī ham zulm saheñge jabr-o-sitam pe chup na raheñge
ek na.e elaan kī saa.at ek na.e manshūr kā din hai

zāt-kade meñ pahroñ bāteñ aur milīñ to mohr ba-lab
jabr-e-vaqt ne baḳhshī ham ko ab ke kaisī majbūrī

'azīz' muñh se vo apne naqāb to ulTeñ
kareñge jabr agar dil pe iḳhtiyār rahā

mirī zabān se haq baat hī nikaltī hai
ye aur baat ki chhātī pe jabr kī sil hai

jabr ke ehsās kī āvāz to pahle bhī thī
inqalāb-e-qismat-e-ādam kā āvāza na thā

jaane kin jabr kī zanjīroñ meñ jakḌī hai hayāt
haiñ kahīñ chāra-e-vahshat ke bhī āsār koī

ye zabānñ-bandī-e-ehsās ye jabr hālāt
jurm hai khole agar dīda-e-bedār koī

nazar meñ shā.iba-e-ḳhauf kis liye aa.e
ye sail-e-jabr hujūm-e-barhana-pā to nahīñ

abhī to husn ke pairoñ pe hai jabr-e-hinā-bandī
abhī hai ishq par ā.īn-e-farsūda kī pābandī

ye zamāne kā jabr hai ki 'salīm'
ho ke mere bane haiñ saudā.ī

umr zindān-e-jabr meñ guzrī
aur abhī din hisāb kā bhī thā

jaane tirī nahīñ ke saath kitne hī jabr the ki the
maiñ ne tire lihāz meñ terā kahā nahīñ kiyā

maiñ ḳhizāñ ko bahār kartā huuñ
jabr ko iḳhtiyār kartā huuñ

sad.hā mutālibāt ke ba.ad ek jām-e-talḳh
duniyā-e-jabr-o-sabr ko dhaḌkā ke pī gayā

ham jabr-e-mohabbat se gurezāñ nahīñ hote
zulfoñ kī tarah terī pareshāñ nahīñ hote

mujhe to jo bhī milā ā.ina-ba-dast milā
maiñ jabr-e-ġhair se thā ḳhud-nigar anā se na thā

havā kā shor sadā-e-sahāb mere liye
jahān-e-jabr kā har iztirāb mere liye

zindagī jabr hai aur jabr ke āsār nahīñ
haa.e is qaid ko zanjīr bhī darkār nahīñ

tirā dil nahīñ tire haath meñ mujhe dekh maiñ huuñ girafta-dil
mirā jabr merī najāt hai ye mire hunar kā kamāl hai

isī duniyā meñ baste haiñ ajab kuchh log aise bhī
jo pal meñ khīñch sakte haiñ ridā-e-jabr miTTī se