Tags-Jabr

vahī afkār kī uljhan vahī māhaul kā jabr
zehn pā-basta-e-zanjīr-e-girāñ hai yaaro

tum bhī karoge jabr shab o roz is qadar
ham bhī kareñge sabr magar iḳhtiyār tak

hayāt aaj bhī kanīz hai huzūr-e-jabr meñ
jo zindagī ko jiit le vo zindagī kā mard hai

jabr ke saath ibādat meñ mazā kyā hogā
shauq se laakh hameñ masjid-o-mimbar khīñche

qubūl kar liyā har dā.ere kī dāvat ko
hisār-e-jabr se bāhar nikalne vāloñ ne

vo bhī kiyā ḳhuun ki ho jabr kī buniyād meñ jazb
jo yūñhī muft meñ bah jaa.e vo ḳhuuñ achchhā hai

jabr āġhāz jabr hī anjām
tujh se ḳhāliq mire ḳhafā huuñ maiñ

ye jabr-e-vaqt hai kaisā ki us kī yaad ke chāñd
ugeñ to phir sar-e-shāḳh-e-malāl jalte raheñ

azāb-e-qabr se bad-tar sahī hayāt-e-'hafīz'
ye jabr hai to ba-juz-sabr kyā kiyā jaa.e

ab is ke baad kuchh bhī nahīñ iḳhtiyār meñ
vo jabr thā ki ḳhud ko ḳhudā kar chuke haiñ ham

ye duniyā akbar zulmoñ kī ham majbūrī kī anārkalī
ham dīvāroñ ke biich meñ haiñ ham narġha-e-jabr-o-jalāl meñ haiñ

apne har jabr ko vo mehr-o-vafā kahte haiñ
ham bhī kuchh naam na deñ us ko mohabbat ke sivā

aap pe apnā iḳhtiyār nahīñ
jabr hai ham par kis qadar dekho

maiñ hī thā vo jo apne hī teshe se mar gayā
hī hī thā shahr-e-jabr ke balvā.i.oñ meñ bhī

kahūñ to kaise kahūñ us ko daur-e-adl-o-atā
hai dār-o-gīr abhī jabr-o-iḳhtiyār abhī

jabr-e-dil-e-be-mehr kā charchā nahīñ hotā
tārīki-e-shab meñ koī chehra nahīñ hotā

aaj hai jabr-o-tashaddud kī hukūmat ham par
kal hamīñ beḳh-kun-e-qaisar-o-ḳhāqāñ hoñge

āzmā.egā bahar-hāl hameñ jabr-e-hayāt
ham abhī aur asīr-e-ġham-e-daurāñ hoñge

kab talak aañkh na kholegā zamāne kā zamīr
zulm aur jabr kī ye riit chalegī kab tak

jabr se nasl baḌhe zulm se tan mel kareñ
ye amal ham meñ hai be-ilm parindoñ meñ nahīñ