Tags-Jannat

jis jagah hūrān-e-jannat kā kiyā hai tazkira
kyā kahā hai aur bhī kuchh ham ne juz husn o hayā

shaiḳh faanī sahī ye dhar magar
terī jannat faqat kahānī hai

terī jannat ko tarastī huī terī duniyā
terī duniyā pe qanā.at nahīñ karne detī

izāfī āsmānoñ meñ muqayyad paañv haiñ mere
mire qadmoñ meñ jannat hai

farishta har bashar ko har zamīñ ko āsmāñ samjhe
ki ham to ishq meñ duniyā ko hī jannat-nishāñ samjhe

gunāhgār ke dil se na bach ke chal zāhid
yahīñ kahīñ tirī jannat bhī paa.ī jaatī hai

girye pe mere zinda-dilo hañste kyā ho aah
rotā huuñ apne maiñ dil-e-jannat-maqām ko

vo jo maañ baap kī izzat nahīñ karte 'gauhar'
un se kah do unheñ jannat nahīñ milne vaalī

maqbūl huī hashr meñ gar merī ḳhajālat
mil jā.egī jannat bhī gunāhoñ kī sazā meñ

kis ke liye allāh ne jannat ko banāyā
bande to yahāñ rahte haiñ har vaqt ḳhatā meñ

vo ai 'sīmāb' kyuuñ sargashta-e-tasnīm-o-jannat ho
mayassar jis ko sair-e-tāj hai jamunā kā sāhil hai

rahī hogī kabhī jannat ye duniyā
magar ab to jahannam ho ga.ī hai

tū aaj bhī hai mere liye jannat-e-ḳhayāl
haiñ tujh meñ dafn merī javānī ke chaar saal

jannat bhī hai dozaḳh bhī hai siine meñ hamāre
ye dāġh-e-nihāñ aur hai ye soz-e-nihāñ aur

maiñ use DhūñDā kiyā jismoñ kī jannat meñ magar
vo mujhe ḳhvāboñ meñ milne kī sazā detā rahā

kise ḳhabar hai qayāmat meñ ham mileñ na mileñ
fazā-e-rauz-e-jannat meñ ham mileñ na mileñ

najāt ho yā sazā ho merī mile jahannam ki pā.ūñ jannat
ham ab to un ke qadam pe apnā gunah-bharā sar jhukā chuke haiñ

nahīñ nazākat se ham meñ tāqat uThā.eñ jo nāz-e-hūr-e-jannat
ki nāz-e-shamshīr-e-pur-nazākat ham apne sar par uThā chuke haiñ

kyā tirī talvār bhī mujh se ġhubār-ālūd thī
ḳhūn-e-dil kā rañg kyuuñ ai teġh-zan mailā huā

andesha-e-arbāb-e-haram saath rahegā
jannat bhī milegī to ye ġham saath rahegā