Tags-Justice

dāvar-e-hashr kā insāf ishāre un ke
bas yahī hai kisī bande kā ḳhudā ho jaanā

shikvoñ kā gilā kyā hai insāf to kar zālim
kyā kuchh na kiyā hotā gar tū merī jā hotā

abas uljhā ke rakkhā hai koī insāf bhī āḳhir
umīdeñ saath deñgī 'shād' āḳhir kab talak terā

apne is ahd kā insāf hai tāqat kā ġhulām
aañch bhī kursī-nashīñ par nahīñ aane detā

zulm hai ye to ki dil lījiye aur rahiye ḳhafā
kahīñ insāf zamāne meñ rahā hai ki nahīñ

hai sū-e-falak nazar tamāshā kyā hai
insāf karo donoñ meñ kaun achchhā hai

insāf kā tarāzū jo haath meñ uThā.e
jurmoñ ko Thiik tole

ḳhuub insāf hai ai bāda-kasho kyā kahnā
tum ko taskīn ho gardish ho jo paimāne ko

chashm-e-insāf se tūfāñ na huā thā so huā
dil-e-'aḳhtar' chamanistāñ na huā thā so huā

insāf kī ye aañkh ye sūraj kī raushnī
yārab yahī hai din to mujhe raat chāhiye

ḳhudā aur us ke insāf se Darne vaale
ḳhatā-posh kamzor dil

yahī insāf tire ahd meñ hai ai shah-e-husn
vājib-ul-qatl mohabbat ke gunahgār haiñ sab

har-chand ki insāf kā ḳhvāhāñ bhī vahī hai
qātil bhī vahī aur nigahbāñ bhī vahī hai

bajā tirā nāz-e-be-niyāzī magar ye insāf bhī nahīñ hai
ki terī duniyā meñ tere bande butoñ kī dete phireñ duhā.ī

munsif tire insāf se vāqif huuñ tabhī to
nā-karda gunāhoñ kī sazā DhūñDh rahā huuñ

mansab jahāñ zālim ke asar meñ ho vahāñ par
mazlūm ko insāf milā hai na milegā

ḳhāk-e-sahrā pe jame yā kaf-e-qātil pe jame
farq-e-insāf pe yā pā-e-salāsil pe jame

apne kirdār se insāf kiyā hai maiñ ne
aur kirdār nahīñ koī fasāne meñ mirā

maiñ mohabbat meñ kyā karūñ insāf
koī insāf se zarā kahnā