Tags-Justice

zaḳhm-e-jigar khulā to tabassum kahā gayā
insāf ho sakā na chaman meñ kalī ke saath

sun to o zālim bhalā ye bhī koī insāf hai
lā.eq-e-altāf aadā qābil-e-tāzīr ham

gañvā.e baiThe haiñ āñkhoñ kī raushnī 'shāhid'
jahāñ-panāh kā insāf dekhne vaale

jin kā nazīr dast-e-qazā se na ban sakā
insāf ho to haiñ unhī lā-sāniyoñ meñ ham

ye kyā insāf hai aadil baḌhāyā tishnagī pahle
diyā terī adālat ne shu.ūr-e-shahad-o-sam pīchhe

sab taqāze vaise puure ho ga.e insāf ke
bas faqat mahfūz merā faisla rakkhā gayā

ḳhvāh kar insāf zālim ḳhvāh kar bedād tū
par jo fariyādī haiñ un kī sun to le fariyād tū

ta.ajjub hai vahāñ insāf kī ummīd rakhte ho
jahāñ aksar usūloñ kī ḳharīdārī bhī hotī hai

mohtasib sach sach batā ḳhalvat meñ kyā saudā huā
mudda.ī insāf se mahrūm kaise ho gayā

munsif ho agar tum to kab insāf karoge
mujrim haiñ agar ham to sazā kyuuñ nahīñ dete

tanqīd meñ karte haiñ jo insāf se parhez
dar-asl 'qadīr' un ko suḳhan-dāñ nahīñ kahte

insāf karo logo insāf karo pyāro
'shā.ir' kī zamāne meñ duniyā se na.ī dhaj hai

aql ko sab mulk meñ hai daad insāf-o-adal
kyā nihāyat ishq kā hai bādshah be-dād shoḳh

ki arz-o-arsh kā mālik jo hai insāf kā ḳhāliq
vo itnī be-ruḳhī be-e'tinā.ī kaise bartegā

is zamāne se koī tavaqqo na rakh kis meñ himmat hai ḳhanjar pe rakh de zabāñ
adl-gāhoñ meñ insāf bikne lagā sach bhī kahnā hai jurm aadmī ke liye

ye kaun sā insāf hai ai arsh-nashīno
bijlī jo tumhārī hai to ḳhirman hai hamārā

be-kasī par zulm lā-mahdūd hai
matl.a-e-insāf abr-ālūd hai

kyā hai insāf ki juuñ sub.h tū hañstā hai hanūz
mar chukā sham.a sā maiñ girya hī karte karte

ḳhaar hī ḳhaar haiñ tā-hadd-e-nazar dīvāne
hai ye dīvāna-e-insāf udhar kyā legā

aaj bhī shobda-e-ahl-e-havas hai insāf
dast-e-baqqāl meñ purkār tarāzū kī tarah