Tags-Justice

batā basīt zamāne hai kyā yahī insāf
jo hai adū-e-numūd-e-sahar vo raat huuñ maiñ

vaah kyā achchhā taqāzā vaah kyā insāf hai
dard to deñ aap aur tāsīr ham paidā kareñ

insāf bhī yahī hai yahī shān-e-husn bhī
haañ haañ nazar churāo qatīl-e-nigāh se

kuchh der Thahar jā.iye ai banda-e-insāf
ham apne gunāhoñ meñ ḳhatā DhūñDh rahe haiñ

ai falak achchhā kiyā insāf tū ne vaah vaah
rañj mere vāste rāhat zamāne ke liye

tumhīñ ho ta.ana-zan mujh par tumhīñ insāf se kah do
koī apnī ḳhushī se ḳhānamāñ-barbād hotā hai

apne insāf kī zanjīr na dekho ki yahāñ
muflisī zehn kī fariyād bhī kab kartī hai

kyuuñ mujhe shiddat-e-ehsās atā kī itnī
tujh se insāf kā tālib huuñ maiñ ai rab mere

nā-haq ye zulm karnā insāf kah piyāre
hai kaun sī jagah kā kis shahr kā kahāñ kā

ye to nahīñ kahtā huuñ ki sach-much karo insāf
jhūTī bhī tasallī ho to jiitā hī rahūñ maiñ

ab to majbūr haiñ par hashr kā din aane de
tujh se insāf-talab rū-e-gurezāñ hoñge

dekhī hai maiñ ne ye bhī nairañgī-e-zamāna
insāf kī ridā meñ andāz-e-zālimāna

ab kis ke dar pe jā.ūñ maiñ insāf ke liye
munsif ne qātiloñ ko masīhā banā diyā

munsif ko maslahat kī zabāñ raas aa ga.ī
go faisla huā magar insāf kab huā

bedard! zarā insāf to kar is umr meñ aur maġhmūm hai vo
phūloñ kī tarah nāzuk hai abhī tāroñ kī tarah ma.asūm hai vo

shaiḳh jī aap hī insāf se farmā.eñ bhalā
aur aalam meñ koī aisā bhī badnām bhī hai

chashm-e-insāf se nazāra kar
ek qatra yahāñ samundar hai

āḳhir kab tak ye be-niyāzī
insāf se aap hī na kahiye

mere baabā merī ammāñ merī aapī ke sivā
hai milā insāf bhī mujh ko yahāñ to kyā huā

gañvā.e baiThe haiñ āñkhoñ kī raushnī 'shāhid'
jahāñ-panāh kā insāf dekhne vaale