Tags-Justice

raushan gharoñ meñ baañT dī phir raushnī tamām
insāf ye huā hai mirī tīrgī ke saath

insāf jise haq kā taraf-dār kaheñ sab
is mulk meñ qaa.em vo adālat to nahīñ hai

kaun detā hai mohabbat ko parastish kā maqām
tum ye insāf se socho to duā do ham ko

Tuk dekh idhar ġhaur kar insāf ye hai vaah
ho jurm o gunah ġhair se aur naam hamārā

munsifo haath se ab dashna-o-ḳhanjar rakh do
kyā burā hai agar insāf adū detā hai

āgāh kiyā hai dil ko hamāre kis ne tumhārī ḳhūbiyoñ se
insāf karo munsif ho tumhīñ phir kyā hai jo ye ilhām nahīñ

hai tire insāf kā terī tarāzū se vaqār
baaT halke hoñ to aage chiiz bhī bhārī na rakh

insāf kī bhiik kise miltī
qānūn shahādatoñ meñ gum thā

tumhāre har amal ko ham
baḌī īmān-dārī se, baḌe insāf se radd-e-amal deñge

kyā ye insāf hai ai ḳhāliq-e-sub.h-e-gulshan
koī hañstā hai koī girya-kunāñ hotā hai

aa jaa.e tavāzun meñ ye māhaul kī mīzān
insāf ke palḌe meñ magar baar nahīñ hai

gunahgāroñ meñ shāmil mudda.ī bhī aur mulzim bhī
tirā insāf dekhā aur adālat chhoḌ dī ham ne

maiñ bhī insāf kā ḳhvāhāñ huuñ magar ai mālik
terī duniyā meñ ab insāf kahāñ hotā hai

ḳhudā ke haath hai ab apnā ai 'qalaq' insāf
butoñ se hashr meñ hogā muāmla dil kā

apne a.amāl kī tausīf meñ masrūf hai vo
ahl-e-insāf zarā us ko tarāzū denā

ai 'tāj' rifāqat na sahī dukh hai to ye hai
insāf bhī ik bhaa.ī ko bhaa.ī nahīñ detā

insāf kar ḳharāb na phirtā maiñ dar-ba-dar
miltī jo tere gosha-e-ḳhātir meñ jā mujhe

kyā tum se ziyāda hai duniyā meñ hasīñ koī
īmān se kah denā insāf zarā karnā