Tags-Justice

haa.e sayyād ye insāf se tere hai ba.iid
yaañ talak kiije sitam apne giraftār ke saath

kaun detā hai mohabbat ko parastish kā maqām
tum ye insāf se socho to duā do ham ko

nā-tavāñ mujh sā bhalā kaun hai insāf to kar
chashm-e-fattāñ ke tire garche haiñ bīmār ka.ī

kuchh to insāf bhalā kījiye dil meñ apne
tum ne maanī bhī kabhī merī ajī baat koī

insāf-var haiñ jitne vo is ko mānte haiñ
duniyā kī har sharārat ham ḳhuub jānte haiñ

kyā yahī thī shart kuchh insāf kī ai tund-ḳhū
jo bhalā ho aap se us se burā.ī kījiye

balā se jurm ho insāf kī nigāhoñ meñ
tumhārī baat to lagtī hai munsifāna mujhe

kare hai fariyād ek aalam galī meñ us kī hai shor-e-mahshar
jo ek ho.e to kiije insāf us ke haiñ dād-ḳhvāh lākhoñ

adl-o-insāf taqāzā-e-mashiyyat hī sahī
zindagī hī meñ magar roz-e-jazā kyuuñ aa.e

ye kyā insāf hai sayyād chhoḌe qaid se mujh ko
ki aisā koī murġh-e-ḳhush-navā ab tak nahīñ aayā

qatl-gāhoñ meñ lahū apnā nichhāvar kar ke
sham-e-insāf kī lau ham ne baḌhā rakkhī hai

ham ko to jhūlnā hī thā insāf ke liye
ye kiil kyuuñ salīb meñ nāhaq jaḌe rahe

jab tujh se na suljheñ tire uljhe hue dhande
bhagvān ke insāf pe sab chhoḌ de bande

qabl-e-insāf chal basā mulzim
ab adālat se kyā ravā rakhiye

is qadar aap ham pe zulm kareñ
is kā insāf aap hī se hai

mirī pākīzgī ne hī banāyā hai mujhe munsif
so maiñ insāf karte vaqt har laġhzish se Dartā huuñ

junūñ ke raaj meñ insāf hogā
na hogā farq jeb o āstīñ meñ

zālim phirā mizāj na terā ġhurūr se
insāf kar tū maiñ tirī kyā kyā jafā sahī

is adā ko to Tak ik sair kar insāf karo
vo burā haigā bhalā dosto yā maiñ hī huuñ

tujhī pe munsifī hai le tū hī insāf se kah de
agar terī tarah maiñ bevafā hotā to kyā hotā