Tags-Abroo

har ik shaam chalte haiñ tīr-e-nigah yaañ
nikalte haiñ abrū-kamāñ kaise kaise

mushtarī o zohra bāham saad haiñ
is liye abrū hilāl aatā hai aaj

ka.aba-rū mehrāb-e-abrū ai 'amīr'
apnī taa.at apnā īmāñ aur hai

vasf-e-kamān-e-abrū jo kījiye so kam hai
be-tīr bismiloñ ke tuude lagā diye haiñ

Tak abrū ko merī taraf kiije maa.il
kabhū dil bhī rakh liije maa.il kā apne

aks-e-abrū dekhte haiñ bāda-e-sar-josh meñ
iid hai sāqī-parastoñ meñ hilāl-e-jām kī

chashm-o-abrū ko tire dekh ke aatā hai ḳhayāl
tāq-e-kisrā pe yahāñ sāġhar-e-jam bhuul ga.e

jatāve ulfat chaḌhāve abrū idhar lagāvaT udhar taġhāful
kare tabassum jhiḌak de har dam ravish haTīlī chalan daġhā kā

abrū jaatī agar be-asar aañsū bahte
shukr añgusht-numā panja-e-mizhgāñ na huā

jo hai gosha-nashīñ tere ḳhayāl-e-mast-e-abrū meñ
vo hai bait-us-sanam meñ bhī to hai baitul-muqaddas meñ

bal hai abrū pe nazar tez ḳhudā ḳhair kare
aaj kuchh hashr ke āsār nazar aate haiñ

kidhar abrū kī us ke dhaak nahīñ
kaun is teġh kā halāk nahīñ

hazār ham-suḳhnī ho hazār ham-nazarī
maqām-e-jumbish-e-abrū nikal hī aate haiñ

ham vo muḳhlis haiñ ki āñkheñ dekhte guzrī hai umr
jī nikal jaave jo ho ham se kaj-abrū āshnā

tere liye taqdīr mirī jumbish-e-abrū
aur maiñ tirā īmā-e-nazar dekh rahī huuñ

za.īfī meñ bhī dil meñ hai yād-e-abrū
kabāda haiñ ḳhud aur kamāñ khīñchte haiñ

kahāñ tak utartī hai siine pe mere
tirī teġh-e-abrū kā dam dekhte haiñ

mizha-e-abrū-nigah se is kī 'mīr'
kushta haiñ apne dil lagāne ke

pañkhuḌī phuul kī lab aañkh hai gahrā sāgar
abrū haiñ teġh se aur chaal qayāmat likhnā

yahī jaam partav-e-ruḳh tirā yahī terī zulf ko ā.īna
mah o abrū mai kī hasīñ fazā ise roknā ye fazā ga.ī