Tags-Abroo

be-hisī shart hai jiine ke liye ye duniyā
ḳham-e-abru hai ki ḳhanjar nahīñ dekhā jaatā

ḳhāliq ne jab kahā ḳhalq abrū ke bismiloñ kā
gardan mirī banā.ī ḳhanjar tirā banāyā

nargis-e-mast tirī jaa.e jo tul barsar-e-gul
teġh-e-abrū se girāve sar-e-gul barsar-e-gul

qasd jab jaane kā kartā huuñ maiñ us shoḳh ke paas
teġh-e-abrū ye kahe hai ki sambhal kar aanā

suḳhan-bar ġhuncha-lab gul-rū jabīn-e-mahar aur kamāñ-abrū
do chashm-e-shoḳh pur-jādū nigah tiir aur mizha nashtar

jo Tiika sandal kā hai jabīñ par to paas abrū kī ḳhaal bhī hai
sip.har-e-ḳhūbī ye maah bhī hai sabīl bhī hai hilāl bhī hai

zulf zanjīr-e-sitam teġh-e-jafā haiñ abrū
dil-e-vahshat-zada ab bachne kī sūrat kyā hai

karte ho abrū se kushta ruḳh se dete ho jilā
husn meñ e.ajāz kyā kyā roz-o-shab karte haiñ aap

kulāh-e-kaj ko haTā kar dikhā diyā abrū
qasam alī kī khiñchī zul-fiqār dekh chuke

ishāre aap kī abrū ke koī kyā jaane
ki kitne zahr ke tiir is kamāñ meñ rahte haiñ

aabrū rakh lī ḳhudā ne us kī ham-chashmoñ meñ aah
teġh-e-abrū kā tirī ghā.el Thikāne lag gayā

ham ko to un ke ḳhanjar-e-abrū ke ishq meñ
din zindagī ke kāTne dushvār ho ga.e

sanam kī satr-e-abrū kātib-e-qudrat ne likhī hai
kalīd-e-ilm-e-ma.anī hai ye bismillāh sūrat meñ

kamāñ sī abrū kā aalam ajiib hai dekho
falak ke chāñd se behtar hai us hilāl kī baat

yā un ke hasīn abrū aa.e haiñ tasavvur meñ
yā mahfil-e-hastī meñ raḳhshanda hilāl aayā

dāman kī shikan duur se letī hai balā.eñ
bal yaar ke abrū kā utartā hī nahīñ hai

vo bole abrū-o-mizhgāñ ko kyā huā shab-e-vasl
dhare rahe yūñhī nāvak mire kamāñ merī

mehrāb ke ka.abe kā namāzī huuñ to vaañ bhī
juz sajda-e-tāq-e-ḳham-e-abrū na karūñ maiñ