Tags-Khat

ya.anī ye muztarib sī nazar be-sabab nahīñ
ḳhat le ke aa rahā hai koī nāma-bar abhī

vo āshiq ḳhāl-o-ḳhat kā huuñ nazr-e-mor kartā huuñ
mayassar tīsare din bhī jo mujh ko daana aatā hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

is hathelī pe mohabbat kī lakīreñ haiñ bahut
haañ magar zanjīr meñ uljhā ḳhat-e-taqdīr hai

kuchh shahr ke dukhḌe haiñ kuchh ghar ke masā.il haiñ
mujh ko ye tirā ḳhat bhī aḳhbār sā lagtā hai

aaj kā ḳhat hī use bhejā hai korā lekin
aaj kā ḳhat hī adhūrā nahīñ likhkhā maiñ ne

koī sahīfa samajh ke rakkhā tumhāre ḳhat ko chhupā ke dil meñ
mirī mohabbat ko apne dil meñ hamesha tum lā-zavāl rakhnā

ro ro ke likhā ḳhat jo use maiñ ne to bolā
ik harf sar-e-kāġhaz-e-nam uTh nahīñ saktā

paḌhtā nahīñ ḳhat ġhair mirā vaañ kisī unvāñ
jab tak ki vo mazmūñ meñ tasarruf nahīñ kartā

jaisā hai sabz ḳhat tirā aur shoḳh chashm
in donoñ biich aa ke mirā luT gayā hai dil

andāz-e-nāz qahr hai us ke na maiñ kahūñ
par ḳhāl-o-ḳhat meñ jā ke tire baT gayā hai dil

chheḌ manzūr hai kyā āshiq-e-dil-gīr ke saath
ḳhat bhī aayā kabhī to ġhair kī tahrīr ke saath

ḳhat aane se nahīñ ḳhātir jamā hue mutlaq
ise to ḳhat kahūñ yā sabza yā sitam kī kitāb

kisht-e-ummīd kartā sarsabz sabza-e-ḳhat
anjām-e-husn us kā āġhāz hai sarāpā

havā sat.h-e-zamīñ par ab ḳhat-e-gulzār khīñchegī
ki ḳhush aatī nahīñ hai abr kī tahrīr miTTī ko

ek ḳhush-ḳhat se shaḳhs ne 'haidar'
ham ko bhī ḳhush-ḳhayāl kar Daalā

ḳhat ho koī kitāb ho yā dil kā zaḳhm ho
jo bhī hai mere paas nishānī usī kī hai

ġhubār-e-kārvān-e-mor hai ziist
ye ḳhatt-e-yār se āshufta-jāñ huuñ

husn kā vasf tire sūrat-e-ḳhat
ḳhāma-parvāz kiyā chāhiye ab