Tags-Khat

ḳhat ke purze aa.e haiñ qāsid kā sar tasvīr-e-ġhair
ye hai bhejā us sitamgar ne mire ḳhat kā javāb

rū o araq ġhubār-e-ḳhat jumbish-e-zulf kī havā
chāroñ haiñ dil ke haq meñ sam ātish-o-āb o ḳhāk-o-bād

jis din us se baat huī thī us din bhī be-kaif thā maiñ
jis din us kā ḳhat aayā hai us din bhī vīrānī thī

ve din kidhar ga.e ki maiñ likh likh ke ḳhat-e-shauq
jaatā thā aap girya-kunāñ nāma-bar talak

maiñ agarche kar bhī chukā raqam idhar ek daftar-e-rañj-o-ġham
magar intizār hai dam-ba-dam mujhe pahle ḳhat ke javāb kā

sāda-rūī ne to khoyā dil o diiñ se dekheñ
ḳhat ke aane meñ hai qismat kā likhā kyā kyā kuchh

ḳhat likhā karte haiñ ab vo yak qalam mujh ko shikast
pech se dil toḌte haiñ āshiq-e-nāshād kā

hai yaad ḳhuftgān-e-zamīñ kā jo ḳhatt-e-sabz
bhūle se maiñ qadam nahīñ rakhtā giyāh par

tumhārā naam le kar khīñchtī huuñ aa.ine par ḳhat
jhapaktī huuñ zarā āñkheñ to chehra aur hotā hai