Tags-Khat

rāz-o-niyāz meñ bhī akaḌ-fūñ nahīñ ga.ī
vo ḳhat bhī likh rahā hai to chālān kī tarah

ek jā harf-e-vafā likkhā thā so bhī miT gayā
zāhiran kāġhaz tire ḳhat kā ġhalat-bar-dār hai

na ḳhat aa.e par bhī kamī paḌī tirī shān-e-husn meñ yak zarī
vahī qad kī fitnagarī rahī vahī ruḳh kī jalvagarī rahī

moḌ ojhal huā nazroñ se to phir raah vahī log vahī
sirf vo chehra vo āñkheñ vo ḳhat-o-ḳhāl na the

mire qatl kī haqīqat na chhupā sakegā koī
mire qātiloñ ke ghar meñ mirā ḳhat jalā milegā

aane se ḳhat ke jaate rahe vo bigāḌ sab
ban aa.ī ab to hazrat-e-dil lo ḳhizr mile

mire liye to ḳhat-e-intizār khīñchtī hai
tire liye maiñ ḳhat-e-intizār DhūñDhtā huuñ

shamshīr saaf yaar jo zahrāb daada ho
vo ḳhat sabz hai ki ba ruḳhsār saada ho

ai sabza rañg-e-ḳhat bhī banā ab to bosa de
begāna thā jo sabza chaman se nikal gayā

kabhī ye fikr ki vo yaad kyuuñ kareñge hameñ
kabhī ḳhayāl ki ḳhat kā javāb aa.egā

hazār haif ki sar nāma-bar kā aayā hai
samajh rahe the ki ḳhat kā javāb aa.egā

un ke ḳhat mahfūz haiñ ab tak mere ḳhutūt kī file meñ
qasmeñ vaade ahd o paimāñ pyaar bharī tahrīreñ haiñ

tire ḳhatt-e-husn-e-jamāl ko mire harf-e-ā.ina-sāz ne
ka.ī rañg de diye pur-kashish magar ab bhī ek ḳhalā sā hai

ḳhat kā har harf ham ne jalāyā magar
lafz-dar-lafz vābastagī rah ga.ī

vaah baḳht-e-nā-rasā dekhā tujhe
nāma-bar se ḳhat kahīñ jaatā rahā

mashkūk agar hai ḳhat kī likhā.ī to kyā huā
ja.alī banā ke bhej de tū bhī rasīd use

rah gayā dekh ke tujh chashm pe ye satar-e-mizha
sāqiyā yuuñ to paḌhe the maiñ ḳhat-e-jām bahut

ḳhatt-e-āzādī likhā thā shoḳh ne fardā ġhalat
dil meñ rakhtā aur kuchh zāhir likhā inshā ġhalat

purze vo ḳhat ke aaj bhī rakkhe haiñ mere paas
jo bach ga.e the ḳhat ko jalāne ke bāvajūd