Tags-Khat

likhnā kahnā tark huā thā aapas meñ to muddat se
ab jo qarār kiyā hai dil se ḳhat bhī gayā paiġhām gayā

naqsha lail-o-nahār kā khīñchā hai
mausam kā ḳhat judā judā khīñchā hai

na ā.īna hī us sūrat ke aage hakkā-bakkā hai
siyāhī dekh us ke ḳhat ke mad kī dil meñ lukkā hai

ḳhat de ke chāhtā thā zabānī bhī kuchh kahe
rakkhā magar kisī ne dil-e-nāma-bar pe haath

ḳhat pe Tapke hue aañsū ye batāte haiñ 'shakīl'
merī tahrīr ko bārish ne nahīñ dhoyā thā

use zarā sā ḳhat likhne par
ḳharch tamām davāt huī thī

ḳhat jigar ghāyal kare aur phuul Dhaa.e hai sitam
zaḳhm ya.anī ik kurede ik namak-dāñ ban gayā

mohtāt hai itnī ki kabhī ḳhat nahīñ likhtī
kahtī hai mujhe auroñ ke jaisā nahīñ banñā

qāsid ko tak rahā huuñ bajā.e javāb-e-ḳhat
kambaḳht ye na kah de kahīñ ḳhair to nahīñ

nigah be-his ḳhat-e-sāġhar kī sūrat hai ki saaqī ne
diyā hai mardum-e-chashm-e-jahāñ ko jaam hairat kā

ḳhat-e-mahbūb o pā-e-nāma-bar qismat se haath aa.e
lagā āñkhoñ se 'anjum' dam-ba-dam is ko bhī us ko bhī

vaqt hī vo ḳhat-e-fāsil hai ki ai ham-nafaso
duur hai mauj-e-balā aur kināre hue log

ḳhatt-e-māzūlī-e-arbāb-e-sitam khīñch ga.e
ye rasan-basta salīboñ se utāre hue log

har qadam ik ḳhat-e-e.ajāz meñ rakkhe hue haiñ
vo ram-o-raft kis andāz meñ rakkhe hue haiñ

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī

baḌā ehsān ham farmā rahe haiñ
ki un ke ḳhat unheñ lauTā rahe haiñ

qāsid se kyā kahūñ maiñ likhūñ ḳhat meñ un ko kyā
pinhāñ ke dil kā haal hai un par khulā huā

qāsid tū ḳhat ko laayā hai kyūñkar khulā huā
ḳhat hai ki hai ye merā muqaddar khulā huā

yā aa ke ruk ga.ī hai ḳhat-e-tīrgī pe aañkh
hai raushnī to TuuTī huī darmiyāñ se hai

na likhā ḳhat ki ḳhat-e-peshānī
mujh ko hañgām-e-raqam yaad aayā