Tags-Khat

pahuñchā ke ḳhat halāl huā hai ye ai 'sharaf'
āñkhoñ se le ke ḳhūn-e-kabūtar lagā.iye

purze mire uḌā.iye bhejā hai maiñ ne ḳhat
be-jurm kyuuñ kabāb-e-kabūtar lagā.iye

likhne baiThā huuñ tire naam koī ḳhat jab bhī
aañkh se ashk girā sabt huā kāġhaz par

ḳhat tirā jab bhī koī maiñ ne purānā kholā
to ubhar aayā hasīñ naqsh tirā kāġhaz par

ḳhat-o-ruḳh kī sifat meñ raT lagī rahtī hai jo tum ko
'qalaq' kyā hifz qur.āñ kā ma-e-tafsīr karte ho

tahrīr kar ke saikaḌoñ va.ade mukar ga.e
dikhlā.ūñgā huzūr ko roz-e-qayām ḳhat

ghabrā na is qadar dil-e-betāb sabr kar
aatā hai koī roz meñ ab sub.h-o-shām ḳhat

āshiq-navāziyāñ haiñ tabī.at meñ yaar kī
likkhā hai har mahīne meñ bhejo mudām ḳhat

muddat ke ba.ad is ne likhā mere naam ḳhat
merī shikāyatoñ se bharā hai tamām ḳhat

zaa.e.a na jā.egī tirī mehnat kisī tarah
qāsid ajūra detā huuñ chuTkī meñ thaam ḳhat

likkhā hai ab na likkheñge ham koī ḳhat tujhe
ḳhat aayā merī maut kā laayā payām ḳhat

'āġhā' nisār hojiye in.aam dījiye
laayā hai un kā qāsid-e-sarsar-ḳhirām ḳhat

tahrīr un kī siina pe rakh dījiyo mire
badle javāb-e-nāma ke aa.egā kaam ḳhat

ḳhat likh ke aaj Daak pe pahuñcheñge yaar ko
pahuñchā.egā hamārā payām-o-salām ḳhat

likkhā huā hai ḳhaas tumhāre hī haath kā
pahchāntā hai ḳhuub tumhārā ġhulām ḳhat

vo ḳhat raqīboñ ke haath aayā likhā thā jo mere naam tū ne
kahāñ kahāñ kar chukī hai rusvā tirī ye chhoTī sī bhuul tujh ko

faqat salām hī likhtā thā peḌ ko ḳhat meñ
maiñ aaj ḳhush huuñ bahut phuul ko duā likh kar

kisī ne bhejā hai ḳhat pyaar aur vafā likh kar
qalam se kaam diyā hai mujhe ḳhudā likh kar

'qalaq' ḳhat ġhair kā kyuuñ kar na aatā kyuuñ na tum paḌhte
qazā likhī huī hazrat-salāmat aa hī jaatī hai

sabza-e-ḳhat se tirā kākul-e-sarkash na dabā
ye zamurrad bhī harīf-e-dam-e-af.ī na huā