Tags-Khat

jins-e-dil kā tirī us zulf se phirnā ma.alūm
ho ke ḳhat-kash jo bike vo nahīñ saudā phirtā

ye bhī ġhazab kā rashk hai ḳhat to hai nām-e-ġhair par
aur lifāfe par likhā sahv se merā naam hai

ḳhat khīñchte hue koī bachcha baḌā huā
kal ke ḳhutūt aaj ke shāhkār ban ga.e

ḳhat-e-shauq ko paḌh ke qāsid se bole
ye hai kaun dīvāna ḳhat likhne vaalā

tahrīr usī kī hai magar dil
ḳhat paḌhte hue aTak rahā hai

kis tarah roz-e-hashr vo hoveñge sruḳh-rū
dekhā kiye haiñ yaañ jo ḳhat-o-ḳhāl kī kitāb

ḳhat-e-ruḳhsār nahīñ pā-e-nigah ke haiñ nishāñ
āriz-e-sāf pe sau baar paḌī merī aañkh

faqat is lifāfe par hai ki ḳhat āshnā ko pahuñche
to likhā hai us ne 'inshā' ye tirā hī naam ulTā

tum havā un khiḌkiyoñ se sirf itnā dekhnā
us ne koī ḳhat kisī ke naam likkhā is taraf

ḳhat-e-sar-navisht apnā ham paḌh rahe haiñ
tumhārā jo naqsh-e-qadam dekhte haiñ

hameñ is kī kahīñ se ḳhabar na milī huī umr tamām magar na milī
kabhī us ne bhī haal kiyā na raqam ḳhat-e-shauq ravāna hazār kiyā

mere chūme hue hāthoñ se
auroñ ko ḳhat likhtā hogā

maiñ nāzuk-mizājī se vāqif huuñ qāsid
isī vaj.h ḳhat meñ na likkhā ziyāda

zulfoñ se paḌā tuul meñ ab ishq kā jhagḌā
ḳhat aan ke ye majhla kotāh karegā

jīte-jī mumkin nahīñ us shoḳh kā ḳhat dekhnā
ba.ad mere aa.egā mere muqaddar kā javāb

aa.ina dekhūñ to 'sābir' ye gumāñ hotā hai
aks mujh se vo ḳhat-e-ḳhāl-e-javānī māñge