Tags-Khizan

apnā ma.āl-e-zindagī phūloñ ko dekh kar samajh
aaj ḳhizāñ-nasīb haiñ kal jo khile bahār meñ

dāġh-e-jigar ke phuul meñ phuul sadā-bahār ke
rahtā hai rañg ek saañ in kā ḳhizāñ bahār meñ

jo dekhūñ jā ḳhizāñ meñ haa.e ḳhāristān o patjhaḌ thā
na ġhunche the na gul ne bulbuleñ ne bed kā saayā

aa.e to is vaqār se ab ke azāb-e-hijr
sharminda ye bahār bhī ab ke ḳhizāñ meñ ho

bād-e-ḳhizāñ ne rañg-e-chaman kyā uḌā diyā
āḳhir ko nikle ḳhāk-basar bostāñ se ham

ba-nām-e-fasl-e-bahār 'āzar' vo zard patte hī mo'tabar the
jo hañs ke rizq-e-ḳhizāñ hue haiñ jo sabz shāḳhoñ pe jhuul aa.e

ga.ī ye kah kar aane se ḳhizāñ ke peshtar bulbul
phir in āñkhoñ se kyūñkar dekhā jā.egā chaman ḳhālī

nigāh-e-yār se hotā hai vo ḳhumār mujhe
ki rut ḳhizāñ kī bhī lagne lage bahār mujhe

ai bahār-e-sar-girāñ tū ḳhizāñ-nasīb hai
aur ham taras ga.e tere iltifāt ko

ḳhizāñ guzar ga.ī lekin guloñ ke rañg haiñ zard
bahār ko sila-e-ḳhūn-e-kushtagāñ na milā

yak-shabī niiñd ke tasavvur meñ ūñghtā hai
ḳhizāñ-rasīda anaar kā ik shajar khaḌā hai

ḳhizāñ jab tak chalī jaatī nahīñ hai
chaman vāloñ ko niiñd aatī nahīñ hai

bhaTak rahī haiñ ḳhizāñ diida ḳhār-o-ḳhas kī tarah
vo kam nazar jo chale the chaman chaman karte

mauj-e-nasīm apnī bahāreñ luTā ga.ī
lekin ḳhizāñ kī muda-dilī kam na ho sakī

kuchh bahāroñ meñ ḳhizāñ hai kuchh ḳhizāñ meñ hai bahār
phuul murjhā.e to ġhuncha gulistāñ bantā gayā

dī rihā.ī mujhe sayyād ne ai vaa.e nasīb
daḳhl jab fasl-e-ḳhizāñ kā huā gulzāroñ meñ

chaman se uTh gayā 'raunaq' jab āshiyāñ apnā
na phir bahār se matlab na kuchh ḳhizāñ se hameñ

mujhe ai ham-nafas andesha-e-barq-o-ḳhizāñ kyuuñ ho
mirī parvāz mahdūd-e-fazā-e-gulsitāñ kyuuñ ho

aur kab tak be-samar rakhtī ḳhizāñ peḌoñ ke haath
rut badal jaanā thī ye jañgal harā honā hī thā

ye barg-e-zard daraḳhtoñ se jhaḌ ga.e kaise
ḳhudāyā kaash ye daur-e-ḳhizāñ nahīñ hotā