Tags-Khoon

raat vo ḳhuun rulātī hai udāsī dil kī
rone lagtā hai lipaT kar mirā bistar mujh se

is zamāne kī ajab tishna-labī hai ai 'zafar'
pyaas us kī sirf bujhtī hai hamāre ḳhuun se

aañkh kyā hai husn kī rañgīniyoñ kā aa.ina
dil hai kyā ḳhūn-e-tamannā kā chhalaktā jaam hai

ḳhair-bāshad ki mire ḳhuun kī sī
surḳhī ai rañg-e-hinā tujh meñ hai

aah ye rañgīn mausam ḳhuun kī barsāt kā
chhā rahā hai aql par jazbāt kī halchal kā rañg

abas mal mal ke dhotā hai tū apne dast-e-nāzuk ko
nahīñ jaane kī surḳhī haath se ḳhūn-e-shahīdāñ kī

yuuñ pisne ko dil laakh piseñ barg-e-hinā par
vo haath kabhī ḳhuun meñ bhartā hī nahīñ hai

kaal aur qaht kī sejoñ ko sajātī nahīñ maiñ
ḳhuun mazdūr kā galiyoñ meñ bahātī nahīñ maiñ

vo log aa.eñ jinheñ hausla ziyāda hai
ġhazal meñ ḳhuun kā masraf zarā ziyāda hai

bahār-e-gulistāñ ham ko na pahchāne ta.ajjub hai
guloñ ke ruḳh pe chhiḌkā hai bahut ḳhūn-e-jigar ham ne

aag sī garmī agar tere badan meñ hai to ho
dekh mere ḳhuun meñ bhī valvala paanī kā hai

zaḳhm-e-nazāra ḳhūn-e-nazar dekhte raho
jo kuchh dikhā.e dīda-e-tar dekhte raho

tamāshā dekhiye mahshar meñ qātil mujh se laḌtā hai
ki apne ḳhuun kā dhabba chhuḌā de mere dāman se

ye urūj-e-daulat-e-qaisarī ye shikoh-e-tāj-e-sikandarī
ki yahāñ to ḳhūn-e-ġharīb se hai tapish meñ nabz-e-tavañgarī

dāstāñ un kī adāoñ kī hai rañgīñ lekin
is meñ kuchh ḳhūn-e-tamannā bhī hai shāmil apnā

mujhe saaf batā.e nigār agar to ye pūchhūñ maiñ ro ro ke ḳhūn-e-jigar
male paañv se kis ke haiñ dīda-e-tar kaf-e-pā pe jo rañg-e-hinā na rahā

utar ga.ī hai to siine se mat nikāl use
ki mere ḳhuun ko terī sināñ meñ rahnā hai

din meñ kab ārām kiyā hai
ḳhuun pasīna ek kiyā hai

jigar ke ḳhuun se raushan go ye charāġh rahā
misāl-e-māh chamaktā to dil kā daaġh rahā

ḳhuun paanī ek kar ke daam jab milte nahīñ
haath phailā kar bhī kyā degā koī nān-e-javīñ