Tags-Khoon

ḳhūn-e-ummīd huā ḳhūn-e-tamannā gaahe
dil chhalaktā hī rahā mai ke piyāloñ kī tarah

utārā ḳhuun ke dariyā se hogā sarfaroshoñ kā
banegī teġh kashtī aur qātil nāḳhudā hogā

ab to hañs hañs ke lagātā hai vo mehñdī lekin
ḳhuun rulā degā use rañg-e-hinā mere ba.ad

kisī kī āh-e-sozāñ kā dhuāñ gardūñ pe raqsāñ hai
kisī kā ḳhūn-e-dil rañg-e-shafaq meñ jalva-afshāñ hai

kis kī sūrat meñ nahīñ jalva-e-ḳhūn-e-mazdūr
ḳhūn-e-mazdūr kī qīmat bhī adā kaise ho

koī to hotā jo ḳhūn-e-fan kī qīmat jāntā
dost nāshir se to ab tak uzr-nāme hī mile

surḳhī-e-ḳhūn-e-tamannā kī mahak aatī hai
dil koī TuuTā hai shāyad gul-e-tar se pahle

ḳhūn-e-sar bah gayā maut aa ga.ī dīvānoñ ko
bārish-e-sañg se tūfān-e-sharar se pahle

ḳhūn-e-dil se kisht-e-ġham ko sīñchtā rahtā huuñ maiñ
ḳhālī kāġhaz par lakīreñ khīñchtā rahtā huuñ maiñ

ḳhūn-e-dil-o-jigar na tabassum banā na ashk
mazmūn-e-ārzū koī unvāñ na ho sakā

pyāsā jaatā hai nashtar-e-yār
o rag kuchh ḳhūn-e-nāb de de

ḳhuun hai dil meñ tumhāre abhī afsurda-ḳhirām
surḳh kyuuñ hote haiñ ruḳhsār-e-chaman kyā jāno?

dahkān-e-ġham ne ḳhuun se sīñchī zamīn-e-dil
lekin ye dasht dasht thā sabza na ho sakā

mauja-e-ḳhūn-e-pareshān kahāñ jaatā hai
mujh se aage mirā tūfān kahāñ jaatā hai

bahut mushkil bayāñ hai chashm-o-dil ke ḳhuun hone kā
bahut āsān palkoñ se girānā āñsuoñ kā hai

lāla-e-koh se huā sābit
ḳhūn-e-fariyād josh khātā hai

ḳhūn-e-ushshāq kā uThā biiḌā
be-sabab kab vo paan khātā hai

ġham kā dariyā suukh na jaa.e us kī ravānī kam na paḌe
ḳhūn-e-jigar bhī shāmil kar luuñ aañkh meñ paanī kam na paḌe

hai ḳhūn-e-dil abhī sar-e-mizhgāñ jamā huā
un kī taraf na dīda-e-ġhammāz dekhnā

jal jaa.e jahāñ ḳhuun nahīñ khaultā un kā
ham barf-zada logoñ kī fitrat se jale haiñ