Tags-Khoon

tamām raat bujheñge na mere ghar ke charāġh
ki ye charāġh haiñ ḳhūn-e-dil-o-jigar ke charāġh

ye ḳhuun aur pasīne kī bū nahīñ jaatī
na jaane kis ke badan kā libās hai duniyā

ḳhūn-e-jigar āñkhoñ se bahāyā ġham kā sahrā paar kiyā
terī tamannā kī kyā ham ne jīvan ko āzār kiyā

surḳhiyāñ ḳhuun meñ Duubī haiñ sab aḳhbāroñ kī
aaj ke din koī aḳhbār na dekhā jaa.e

nashsha-e-shauq-e-rañg meñ tujh se judā.ī kī ga.ī
ek lakīr ḳhuun kī beach meñ khīñch dī ga.ī

karūñ maiñ ḳhuun kā da.avā to pesh-e-dāvar-e-mahshar
qayāmat hai magar qātil se āñkheñ chaar ho jaanā

ab dhanak ke rañg bhī un ko bhale lagte nahīñ
mast saare shahr vaale ḳhuun kī holī meñ the

dilchasp naam sun ke lage māñgne hasīñ
kis ne zarā se ḳhuun kā dil naam rakh diyā

apne hī ḳhuun meñ ālūda kiye baiThā huuñ
kaun is haath meñ ab dast-e-hinā.ī degā

sūraj ġhurūb hote hue mujh se kah gayā
kuchh to batā ki kaisā hai ḳhūn-e-jigar kā rañg

chāhatoñ ke dā.ere jab be-nishāñ hone lage
phir mire ḳhūn-e-tamannā meñ nahā.īñ uñgliyāñ

dostī ḳhūn-e-jigar chāhtī hai
kaam mushkil hai to rasta dekho

hausla teġh-e-jafā kā rah na jaa.e
aa.iye ḳhūn-e-tamannā kījiye

zabt kī daad na dī koī zamāne ne mujhe
ḳhuun kā ghūñT ba-har-hāl piyā hai maiñ ne

rañg bhar jaatā hai phir ishq ke afsāne meñ
ashk ban ban ke agar ḳhūn-e-jigar jaatā hai

shahr meñ dehāt meñ har raah meñ
ḳhuun kī ik jū-e-ravāñ duur tak

banā letā hai mauj-e-ḳhūn-e-dil se ik chaman apnā
vo pāband-e-qafas jo fitratan āzād hotā hai

gar sāmne us ke bhī gire ashk to dil se
kyuuñ roz-e-jazā ḳhuun kā daavā na kareñge

maiñ ne apnī ḳhvāhishoñ kā qatl ḳhud hī kar diyā
haath ḳhūn-ālūd haiñ in ko abhī dhoyā nahīñ

zindāñ zindāñ shor-e-anal-haq mahfil mahfil qul-qul-e-mai
ḳhūn-e-tamannā dariyā dariyā dariyā dariyā dariyā aish kī lahr