Tags-Khoon

ham ne maanā jañg kaḌī hai
sar phūTeñge ḳhuun bahegā

ḳhūn-e-jigar kare hai dil ko lahū kare hai
ye daur aadmī ko yuuñ surḳh-rū kare hai

kal mātam be-qīmat hogā aaj un kī tauqīr karo
dekho ḳhūn-e-jigar se kyā kyā likhte haiñ afsāne log

sitam sahne kī aadat is qadar ham ko paḌī 'nīraj'
kahīñ kuchh ho, nahīñ ab khaultā hai ḳhuun siine meñ

aaj bhī 'yāvar' hañste hañste aañkh meñ aañsū aa jaate haiñ
dard kī maujeñ ḳhuun kī lahreñ aag kā dariyā kyā nahīñ dekhā

ba-rañg-e-lāla-e-sar mai-kashī nahīñ tujh bin
ki ḳhūn-e-dil se maiñ har roz toḌtā huuñ ḳhumār

arzāñ hai bahut ḳhuun farozāñ hai bahut shaam
kyā apnī hī mahfil meñ charāġhāñ na karoge

ḳhūn-e-dil hai surḳh-rūī kā nishāñ
mujh ko bismil apnā ai qātil samajh

munkashif hone lagā ḳhuun hathelī pe mire
ek laḌkī kī hathelī jo hinā.ī huī hai

kaun kahtā hai maiñ sahrā meñ huuñ maiñ tishna huuñ
ḳhūn-e-dil roz bahā roz hī barsāt huī

rūh-e-bahār ḳhūn-e-shahīdāñ kā rañg dekh
ḳhāk-e-chaman ko lāla-qabā kar diyā gayā

dāman-e-mohabbat par dil kā ḳhuun bhī hogā
terā ġham manā.egī kaise chashm-e-tar tanhā

fitna phir aaj uThāne ko hai sar lagtā hai
ḳhuun hī ḳhuun mujhe rañg-e-sahar lagtā hai

jo amrit chhoḌ kar ham log bhī vish-pān kar lete
to apne ḳhuun meñ ye saañp lahrāyā nahīñ hotā

mauja-e-ḳhūn-e-pareshān kahāñ jaatā hai
mujh se aage mirā tūfān kahāñ jaatā hai

tujh bin jagah sharāb kī piite the dam-ba-dam
piyāle siiñ gul ke ḳhuun jigar kā chaman meñ ham

is meñ hai ḳhūn-e-dil kā samundar chhupā huā
āñkhoñ meñ ek ashk bhī tūfāñ se kam nahīñ

shafaqī ho ga.ī dīvār-e-ḳhayāl
kis qadar ḳhuun bahā hai ab ke

ragoñ meñ jamte hue ḳhuun kī tarah hai 'sa.ūd'
vo harf-e-hijr jo us ne abhī kahā bhī nahīñ