Tags-Khoon

soch lo kal kahīñ aañsū na bahāne paḌ jaa.eñ
ḳhuun kā kyā hai ragoñ meñ vo yūñhī khaultā hai

ḳhuun kī rotī safedī be-sadā sāzoñ kā shor
be-sar-o-pā giit koī be-zabāñ gā.egā kyā

ḳhūn-e-jigar meñ fikr kī gahrā.iyāñ bhī haiñ
gar hai mizāj-e-falsafa-dānī ġhazal suno

na hogā rā.egāñ ḳhūn-e-shahīdān-e-vatan hargiz
yahī surḳhī banegī ek din unvān-e-āzādī

ḳhūn-e-hayāt ḳhūn-e-tarab ḳhūn-e-ārzū
ye sharah-e-muḳhtasar mirī umr-e-vafā kī hai

qindīl-e-sahar nūr-e-manzil ḳhurshīd-e-sahar sham-e-sāhil
ye ḳhūn-e-shahīdāñ kā maḳhzan ye dard-e-rafīqāñ kā hāsil

ab mirā ḳhūn-e-jigar hāthoñ meñ malte haiñ vo
us se nafrat thī jinheñ rañg-e-hinā se pahle

mirā ḳhūn-e-dil yuuñ bahā dasht meñ
ki jañgal meñ lohū ke thāle paḌe

jin kī halkī gahrī talḳhī ḳhuun meñ rach rach jaatī hai
juzv-e-hayāt banāne paḌe haiñ vo ash.ār-e-'mīr' hameñ

kahā ye ḳhvāhish-o-tarġhīb aur ye ḳhuun ke rishte
kahā zindāniyoñ ke paañv meñ zanjīr hotī hai

hazār rañg khile gul chaman ke haiñ shāhid
ki rozgār ke sar ḳhuun hai hazāroñ kā

mirī hasratoñ kā na ḳhuun kar nahīñ yuuñ na rok mirī zabāñ
mirī sard aah pe shak na kar ye to merā husn-e-kalām hai

zindagī-bhar aarzū kā ḳhuun hī hotā rahā
lab pe lekin ek din bhī aah tak aa.ī na thī

zulm phir zulm hai baḌhtā hai to miT jaatā hai
ḳhuun phir ḳhuun hai Tapkegā to jam jā.egā

huā ḳhūn-e-tamannā us kā shikva kyā kareñ tum se
na kuchh sochā na kuchh samjhā jigar par tiir khā baiThe

'shā.ir' ye zamīñ hazrat-e-ġhālib kī zamīñ hai
har sher talab kartā hai ḳhūn-e-rag-e-jāñ aur

farhād kis ummīd pe laatā hai jū-e-shīr
vaañ ḳhuun kī havas hai nahīñ ārzū-e-shīr

āshiq haiñ apne ḳhūn-e-jigar-ḳhvār zahr-nosh
raġhbat taraf shakar ke hai un ko na sū-e-shīr