Tags-Khoon

āñkhoñ meñ ḳhuun thā ki zamīñ thī lahū lahū
zanjīr-e-ġham pahan ke tamāshā bhī the hamīñ

dostoñ kī mehrbānī se huā ye kaam bhī
maiñ ne dekhā hī nahīñ thā ḳhuun paanī rañg kā

bāñdhe na phire ḳhuun par apnī to kamar ko
ye jān-e-subuk tan pe tire baar na hove

ḳhud apne dil kā ḳhuun fazā meñ uchhāl ke
mazmūñ likhe haiñ ham ne firāq o visāl ke

mai ko gul-rañg kar diyā kis ne
ḳhuun le kar kalī ke siine se

dhuup aisī hai ki dariyā suukh jaa.eñ
ḳhuun ke chhīñToñ se rut badlegī kyā

girya-e-judā.ī ko sahl jānñe vaalo
dil se aañkh kī jānib ḳhuun dauḌtā paayā

fikr o fan kī shahzādī kis balā kī hai nāgin
shab meñ ḳhuun piitī hai din meñ zahr ugaltī hai

koī is ḳhvāb kī ta.abīr badal de yā-rab
ghar meñ bahtā huā ik ḳhuun kā dariyā dekhā

tujh ko to quvvat-e-iz.hār zamāne se milī
mujh ko āzāda-ravī ḳhuun jalāne se milī

saarā badan hai ḳhuun se kyuuñ tar use dikhā
shah-rag kaTī hai jis se vo nashtar use dikhā

mujhe batāo koī kaam phir se karne kā
maiñ apnā ḳhuun pasīna badal ke aayā huuñ

ḳhuun se tar-ba-tar kar ke har rahguzar thak chuke jānvar
lakḌiyoñ kī tarah phir se chūlhe meñ jal jo huā so huā

jis aañkh meñ hai ḳhūn-e-tamannā mirā 'afroz'
us aañkh meñ surme kī karāmāt to dekho

phir bhar rahā huuñ ḳhāma-e-mizhgāñ ba-ḳhūn-e-dil
sāz-e-chaman tarāzi-e-dāmāñ kiye hue

bhuuk kī kaḌvāhaT se sard kasīle hoñT
ḳhuun ugalte sūkhe chaTḳhe piile hoñT

ashk-e-ḳhūn-e-dil-e-vahshī dabe paañv vaalā
ik musāfir hai ki palkoñ se guzartā hī nahīñ

zamīñ ne ḳhuun uglā āsmāñ ne aag barsā.ī
jab insānoñ ke dil badle to insānoñ pe kyā guzrī

kyā pata kab ḳhuun kā pyāsā yahāñ ho jaa.e kaun
yuuñ to kahne ko sabhī mai-nosh haiñ yāroñ ke biich

kartī haiñ ḳhuun charḳh butoñ kī ta.alliyāñ
rañg-e-shafaq lagātī hai saqf-e-kunisht meñ