Tags-Ada

kibriyā.ī kī adā tujh meñ hai
garche tū but hai ḳhudā tujh meñ hai

tirī adā-e-taġhāful kī jaan se zālim
vo ik adā tirī jis par tujhe bhī naaz nahīñ

jī bhar ke use dekhā lekin ab tak ye nazar bhartī hī nahīñ
ma.asūm adā meñ rah rah kar ik baat nikaltī rahtī hai

hai sīrat-e-at.har mirā sarmāya-e-hastī
mahbūb-e-do-ālam kī hai ek ek adā yaad

sharmā ke yuuñ na dekh adā ke maqām se
ab baat baḌh chukī hai hayā ke maqām se

vo zulf khol ke sharmā.eñ ġhair ke ghar aaj
kuchh is adā se shab-e-ġham ho mehmāñ merī

mudda.ī ko banā na deñ mujrim
munsifoñ kī adā se Darte haiñ

is adā se mujhe salām kiyā
ek hī aan meñ ġhulām kiyā

adā ko adā-āshnā chāhtā huuñ
tujhī par tujhe mubtilā chāhtā huuñ

kaun sī ān-o-adā hai ki nahīñ jī ko lage
khub rahī haiñ vo tirī sab harakāteñ dil meñ

hamīñ ko dekh ke ḳhanjar nikālte the aap
hamāre baad to ye rasm phir adā na huī

tirī adā kī qasam hai tirī adā ke sivā
pasand aur kisī kī hameñ adā na huī

tumhīñ kaho tumheñ nā-āshnā kaheñ na kaheñ
ki āshnā se adā rasm-e-āshnā na huī

dushman ke ghar se chal ke dikhā do judā judā
ye bāñkpan kī chaal ye nāz-o-adā kī hai

aisā banā diyā tujhe qudrat ḳhudā kī hai
kis husn kā hai husn adā kis adā kī hai

har ek lamha kiyā qarz zindagī kā adā
kuchh apnā haq bhī thā ham par vahī adā na huā

haq merī mohabbat kā adā kyuuñ nahīñ karte
tum dard to dete ho davā kyuuñ nahīñ karte

farāz-e-koh se aatā hai jis tarah paanī
kabhī vo aañkh se aisī adā ke saath utre

ab Thahar jā yād-e-jānāñ ro to luuñ
farz-e-tanhā.ī adā ho jā.egā