Tags-Ada

zamīñ par is adā se paañv rakkhā
ki āñkheñ khul ga.iiñ naqsh-e-qadam kī

aa phañsā ishva-o-andāz-o-adā meñ yuuñ dil
rahzanoñ meñ kare juuñ rāh-farāmosh guzār

hotī nahīñ hai yūñhī adā ye namāz-e-ishq
yaañ shart hai ki apne lahū se vuzū karo

kuchh is adā se ye dilkash sifāt chaltī hai
kisī ra.iis kī goyā barāt chaltī hai

khīñcheñ jo vo tiir dil bhī de saath
haq kuchh to adā ho dostī kā

kahiye abhī ik adā pe kaT jaa.eñ
dam dekhte the faqat chhurī kā

na jaane ghaḌī kaun ho āḳhirī
hue farz saare adā dekhnā

bulandī pe ḳhud ko bhī paanā kabhī
samay kī badaltī adā dekhnā

adā huā na kabhī mujh se ek sajda-e-shukr
maiñ kis zabāñ se karūñgā shikāyateñ terī

kyā chāhtī hai ham se hamārī ye zindagī
kyā qarz hai jo ham se adā ho nahīñ rahā

kamāl-e-dilbarī meñ kaun sī terī adā kam hai
na shoḳhī kam hayā se hai na shoḳhī se hayā kam hai

kahāñ dil aur kahāñ dil ke ā.īne kī adā
ġharaz savāl se behtar javāb ho na sakā

jo lāzmī thā tire sāmne adā honā
vo ek lafz bayāñ se nikal gayā āḳhir

sanam kī ik ik adā pe 'zākir' na.ī ġhazal kī hai kyā zarūrat
sharārteñ bhī na.ī nahīñ haiñ nazākateñ bhī na.ī nahīñ haiñ

tū ne kabhī sochā to hogā sochā bhī ai mast-adā
terī adā kī ābādī par kitne ghar barbād hue

dekhiye to sabz khetoñ meñ shuāoñ kā hai raqs
sochiye to mausam-e-rañg-e-adā hai muḳhtalif

adā dil se kareñge shukr sab ahl-e-vatan yārab
mai-e-ishrat se jo un kā liyā lab to subū kar de

kyā jāniye kyā ho gayā arbāb-e-junūñ ko
marne kī adā yaad na jiine kī adā yaad

kyā lutf ki maiñ apnā pata aap batā.ūñ
kiije koī bhūlī huī ḳhaas apnī adā yaad