Tags-Ada

ho gayā lāġhar jo us lailā-adā ke ishq meñ
misl-e-majnūñ haal merā bhī fasāna ho gayā

maiñ kahā ek adā kar to lagā kahne ''ūñ-hūñ''
dekh Tuk aañkh churā kar to lagā kahne ''ūñ-hūñ''

vo jo be-sāḳhta hañsne kī adā thī terī
tujh ko ma.alūm nahīñ vo hī davā thī terī

ai shahanshāh-e-kavākib sipah-o-mehr-e-alam
tere ikrām kā haq kis se adā hotā hai

āñkhoñ meñ merī rañg ke dariyā utaar kar
chehre ko us ne pher liyā kis adā ke saath

tū hamesha rahī qātil ke kamar meñ ai teġh
tere sadqe tujhe qātil kī adā bhī aa.ī

ruḳhsat ke ba.ad tere sarāpe se māvarā
ye kaun sī adā hai jo ab yaad aa.ī hai

jaise uchhle junūñ kī pahlī shaam
is adā se vo zulf barham hai

tahakkumāna adā aur faisle dil ke
kamān-e-ābru-e-ḳham-dār toḌ dī maiñ ne

saarī hairat hai mirī saarī adā us kī hai
be-gunāhī hai mirī aur sazā us kī hai

ham se vo rat-jagoñ kī adā kaun le gayā
kyuuñ vo alaav bujh ga.e vo qisse kyā hue

nashāt-e-hijr kā ḳhūgar banā diyā hotā
jafā-e-yār se itnā bhī haq adā na huā

vahī ġhazal kī rivāyāt-e-kāfirī haiñ abhī
vahī hijāb vahī shoḳhī-e-adā bhī hai

isī liye haiñ sazāvār-e-jaur-e-barq-e-sitam
ki haqq-e-ḳhidmat-e-gulchīñ adā nahīñ karte

husn-e-dilkash kā bhī kyā andāz hai
naaz goyā hai adā ḳhāmosh hai

masrūf-e-vāz-o-pand the sultān-e-mashriqain
jo ghar se nikle khelte zohrā ke nuur ain

hijr kī sab musībateñ arz kiiñ us ke rū-ba-rū
nāz-o-adā se muskurā kahne lagā jo ho so ho

kis kis adā se aaj koī jalva-gar huā
aayā nazar ko hosh to dil be-ḳhabar huā

ho un kā dīdār qismat se jab bhī adā ho ga.ī hai namāz-e-mohabbat
nikal aa.e jab bhī vo parde se bāhar nigāhoñ ne jhuk jhuk ke sajde sunā.e