Tags-Khudi

hayāt-e-be-ḳhudī kuchh aisī nā-mahsūs thī 'nātiq'
ajal aa.ī to mujh ko apnī hastī kā yaqīñ aayā

be-ḳhudī meñ kah chalā thā rāz-e-dil
vo to kahiye kuchh ḳhayāl aa hī gayā

yaad itnā rah gayā hai qissa-e-ahd-e-shabāb
ik ḳhumār-e-be-ḳhudī thā aap se begāna thā

kulfatoñ se tañg aa kar be-ḳhudī kī khoj meñ
qāfile is raah par aate raheñ jaate raheñ

ai zindagī junūñ na sahī be-ḳhudī sahī
tū kuchh bhī apnī aql se pāgal uThā to lā

ḳhudī ko bech kar sajda koī sajda nahīñ hotā
jabīn-e-shauq se kah do talāsh-e-āstāñ kab tak

ḳhudī se kaam le taqdīr shāyad kaam aa jaa.e
hujūm-e-ġham meñ 'fā.iq' shorish-e-āh-o-fuġhāñ kab tak

jāñ-ba-lab lamha-e-taskīñ mirī qismat hai 'shamīm'
be-ḳhudī phir mujhe dīvāna banātī kyuuñ hai

har kas-o-nā-kas ho kyūñkar kām-gār-e-be-ḳhudī
ye hunar sīkhā hai dil ne ik baḌe ustād se

kiyā hai jab siiñ amal be-ḳhudī ke hākim ne
ḳhirad-nagar kī ra.ī.yat huī hai rū ba-gurez

aap meñ aa.e bhī to kyā aa.e
lazzat-e-be-ḳhudī nahīñ jaatī

thoḌī sī be-ḳhudī ho to ham uTh ke chal paḌeñ
hosh-o-havās meñ to qadam laḌkhaḌā.eñge

sabhī log mast-e-shu.ūr haiñ ki ḳhudī ke nashshe meñ chuur haiñ
koī ġham-shanās nahīñ yahāñ ġham-e-dil kisī pe na kholiye

sāz-e-āhañg-e-junūñ tār-e-rag-e-jāñ ke liye
be-ḳhudī shauq kī be-sar-o-sāmāñ ke liye

jaan se guzarte haiñ be-ḳhudī meñ ahl-e-dil
vo jo chashm-e-pur-fan ko zulfiqār karte haiñ

agarche ishq meñ ik be-ḳhudī sī rahtī hai
magar vo niind bhī jaagī huī sī rahtī hai

hameñ chaar samt kī dauḌ meñ vahī gard-e-bād-e-sadā milā
bane apnī zaat meñ guuñj ham na ḳhudī milī na ḳhudā milā

be-ḳhudī gar ho ḳhud to aa ke mile
ai ḳhudā be-ḳhudī ajab shai hai

ai sañg-e-āstāñ mire sajdoñ kī laaj rakh
aayā huuñ e'tirāf-e-shikast-e-ḳhudī liye