Tags-Khudi

vaañ sarguzisht-e-dushman vo kah rahe haiñ muñh par
yaañ be-ḳhudī hai is par kyā rāz-dār haiñ ham

tumhārī yaad ne kī rahnumā.ī
ḳhayāl aayā mujhe jab be-ḳhudī kā

na hosh bā-ḳhabar is se na be-ḳhudī āgāh
maiñ kis se pūchhūñ tire shahr-e-iltifāt kī raah

kare kyā sāz-e-bīnish vo shahīd-e-dard-āgāhī
jise mū-e-dimāġh-e-be-ḳhudī ḳhvāb-e-zuleḳhā ho

aur koī gunāh yaad nahīñ
sajda-e-be-ḳhudī ke mujrim haiñ

kahāñ pe laa.ī hai merī ḳhudī kahāñ se mujhe
na apne dil se ġharaz hai na apnī jaañ se mujhe

be-ḳhudī meñ nikal chalā hai kidhar
bhuul jaanā na apnā ghar ai dil

guloñ pe ik be-ḳhudī sī chhā.ī
chaman meñ bahkī huī sabā se

maiñ saare fāsle tai kar chukā huuñ
ḳhudī jo darmiyāñ thī darmiyāñ hai

ga.ī bahār magar apnī be-ḳhudī hai vahī
samajh rahā huuñ ki ab tak bahār baaqī hai

phir be-ḳhudī meñ bhuul gayā rāh-e-kū-e-yār
jaatā vagarna ek din apnī ḳhabar ko maiñ

ḳhudī kā nashsha chaḌhā aap meñ rahā na gayā
ḳhudā bane the 'yagānā' magar banā na gayā

mirī be-ḳhudī hai vo be-ḳhudī ki ḳhudī kā vahm-o-gumāñ nahīñ
ye surūr-e-sāġhar-e-mai nahīñ ye ḳhumār-e-ḳhvāb-e-girāñ nahīñ

har nafas ai jiine vaalo shaġhl-e-paimāna rahe
be-ḳhudī ko zindagī kā pāsbāñ karte chalo

jā.iye aap koī baat nahīñ
aañkh thī be-ḳhudī meñ bhar aa.ī

vo be-ḳhudī thī mohabbat kī be-ruḳhī to na thī
pe us ko tark-e-ta.alluq ko ik bahāna huā

le gayā merī ḳhudī merī anā bhī
ai jabīn-e-shauq sajde de gayā vo

ye be-ḳhudī ye laboñ kī hañsī mubārak ho
tumheñ ye sālgirah kī ḳhushī mubārak ho

ġhalat kahūñ to mirī āqibat bigaḌtī hai
jo sach kahūñ to ḳhudī be-naqāb ho jaa.e

bajā ki dil nahīñ zindān-e-be-ḳhudī kā asiir
magar ye qaid-e-anā se kahāñ rahā hogā