Tags-Khudi

be-ḳhudī meñ jise ham samjhe haiñ terā dāman
ain mumkin hai ki apnā hī garebāñ nikle

hama-tan sarf-e-hoshyāri-e-ishq
kuchh ajab shai hai be-ḳhudī dil kī

be-ḳhudī ko kahūñ kyā maiñ apnā badan
dekhūñ Dhaltā huā sard sī shaam meñ

pilā.e jā ki abhī hosh-e-be-ḳhudī hai mujhe
pilā.e jā mujhe saaqī abhī pilā.e jā

ḳhudī meñ be-ḳhudī ko chhū liyā thā
nasha kāfūr ho kar rah gayā hai

ai be-ḳhudi-e-dil mujhe ye bhī ḳhabar nahīñ
kis din bahār aa.ī maiñ dīvāna kab huā

Dūbtā dekh rahā huuñ maiñ ḳhudī meñ ḳhud ko
dil kī ik bench pe baiThā huā maiñ hañstā huuñ

jis ne 'āmir' matā-e-ḳhudī bech dī sach ye hai ismat-e-zindagī bech dī
sar jhukāne se behtar hai sar dījiye bhiik lene se behtar hai mar jā.iye

tumhārī samt aane kī talab meñ
maiñ ruktī hī nahīñ huuñ be-ḳhudī meñ

agarche isrār-e-be-ḳhudī hai tujhe bhī zar-posh mahfiloñ meñ
mujhe bhī zid hai ki tere dil meñ nuqūsh-e-māzī ubhār aa.uuñ

ḳhudī kī raushnī meñ maiñ ne dekhā hai aqīdat ko
ḳhudā.ī varna aazar kī mirī Thokar pe rakkhī thī

be-iḳhtiyār uThtī hai buniyād-e-be-ḳhudī
aatī hai jab nazar tirī dīvār duur se

na rahī be-ḳhudi-e-shauq meñ itnī bhī ḳhabar
hijr achchhā hai ki 'mahrūm' visāl achchhā hai

ishq un kā mire pahlū meñ ye detā hai sadā
bhuul jā apnī ḳhudī ġhair ko bhī yaad na kar

bas hai ġhubār-e-rāh-e-libās-e-shahanshahī
sultān-e-be-ḳhudī kuuñ tajammul siiñ kyā ġharaz

har ek dar pe jabīñ Tekte ye sajda-guzār
ḳhudā kī khoj meñ nikle the aur ḳhudī se ga.e

ḳhudī merā pata detī hai ab bhī
mujhe mujh se milā detī hai ab bhī

kitnā mushkil hai ḳhud-baḳhud ronā
be-ḳhudī se rihā kare koī

bahut din ba.ad jab maiñ ne ḳhudī kā aa.ina dekhā
to ḳhud mere hī chehre se ka.ī chehre nikal aa.e

mast-e-pindār sahī sāz-e-ḳhudī kyuuñ chheḌūñ
be-ḳhudī ko mirī aatā hai ḳhudā ho jaanā