Tags-Khudi

kahāñ haiñ kahāñ haiñ muhāfiz ḳhudī ke
sanā-ḳhvān-e-taqdīs-e-mashriq kahāñ haiñ

maiñ ḳhudī meñ mubtilā ḳhud ko miTāne ke liye
tū ne to har zarre ko zau dī jagmagāne ke liye

hameñ kam-baḳht ehsās-e-ḳhudī us dar pe le baiThā
ham uTh jaate to vo parda bhī uTh jaatā jo haa.il thā

allāh re be-ḳhudī ki ham un ke hī rū-ba-rū
be-iḳhtiyār unhī ko pukāre chale ga.e

ho salāmat mirā ishq josh-e-junūñ husn ke raaz ḳhud munkashif ho ga.e
itnī mushkil nahīñ rahguzār-e-fanā be-ḳhudī chāhiye āgahī ke liye

dil o diiñ se to guzrā ab ḳhudī chhoḌ
ghar us mah kā ab ik manzil rahā hai

rone meñ jo lazzat hai to aahoñ meñ mazā hai
ai ruuh ḳhudī chhoḌ ki nazdīk ḳhudā hai

'asar' hai aur lazzat be-ḳhudī kī
vo jān-e-intizār aa.e na aa.e

jin kī mahak se ruuh pe taarī hai be-ḳhudī
vo phuul chun rahe haiñ tire gulistāñ se ham

ain ġhurbat meñ nikhartā hai ḳhudī kā jauhar
naḳhl-e-ausāf lahū pī ke harā hotā hai

javānī aur yuuñ ghir jaa.e tūfān-e-havādis meñ
ḳhudā rakkhe abhī to be-ḳhudī kā daur hai saaqī

hai ye tarīq-e-āshiqī chāhiye is meñ be-ḳhudī
is meñ chunāñ-chunīñ kahāñ is meñ agar magar kahāñ

jise maiñ ne kiyā thā be-ḳhudī meñ
jabīñ par ab vo sajda jal rahā hai

tujhe ai ḳhatīb-e-chaman nahīñ ḳhabar apne ḳhutba-e-shauq meñ
ki kitāb-e-gul kā varaq varaq tirī be-ḳhudī se bikhar gayā

vafā kā imtihāñ hai jān-o-tan kī āzmā.ish hai
ḳhudā rakkhe ḳhudī ke bāñkpan kī āzmā.ish hai

chalo mohabbat kī be-ḳhudī ke hasīn ḳhalvat-kade meñ baiTheñ
ajiib masrūfiyat rahegī na ġhair hogā na yaar hogā

be-ḳhudī merī be-ḳhudī na rahe
itnā ehsān ġham-gusār na kar

der tak diid ke maze luuTe
ḳhuub niklī ye be-ḳhudī se ġharaz

aks-e-ḳhudī kā jaama pahan kar nikal gayā
ubhrā jo naqsh rū-e-ḳhayālāt par kabhī

allāh re be-ḳhudī ki tire paas baiTh kar
terā hī intizār kiyā hai kabhī kabhī