Tags-Khudi

fāsle saare miTte jaate haiñ
raqs kartī hai be-ḳhudī mujh meñ

tujh se vābasta zindagī mujh meñ
ek haarī huī ḳhudī mujh meñ

be-ḳhudī ab to sab pe chhā.ī hai
be-tamāshā ye ḳhud-numā.ī hai

kahāñ tak ai vā.izo ye jhagḌe maze uThāne do be-ḳhudī ke
jo hosh meñ huuñ to maiñ ye samjhūñ harām kyā hai halāl kyā hai

qusūr ho gayā qadmoñ pe loT jaane kā
burā na māniye sarkār be-ḳhudī hī to hai

zulfoñ ko be-ḳhudī kī ridā meñ lapeT de
saaqī pa.e-shabāb ki mausam ḳharāb hai

yārab dil-o-nazar pe musallat kabhī na ho
vo be-ḳhudī ki jis meñ shu.ūr-e-ḳhudī na ho

sar pā-e-ḳhum pe chāhiye hañgām-e-be-ḳhudī
rū sū-e-qibla vaqt-e-munājāt chāhiye

vahdat kā vo surūr thā saaqī ke jaam meñ
piine ko ham ne pī hai magar be-ḳhudī nahīñ

be-ḳhudī gum-gashtagī sukr-o-tahayyur mahviyat
kuchh maqāmāt aur bhī paḌte haiñ maiḳhāne ke ba.ad

ishq hai kaif-e-be-ḳhudī is ko ḳhudī se kyā ġharaz
jis kī fazā ho vasl o hijr ishq vo ishq hī nahīñ

kyuuñ ye ḳhudā ke DhūñDne vaale haiñ nā-murād
guzrā maiñ jab hudūd-e-ḳhudī se ḳhudā milā

jahāñ dil meñ simaTte jā rahe haiñ
tamāsha ho rahā hai be-ḳhudī kā

vo mausam be-ḳhudī ke the jo mausam ham guzār aa.e
ki jab chāhā tumhāre naam se ḳhud ko pukār aa.e

ahl-e-zāhir jis qadar chāheñ kareñ bahs-o-jidāl
maiñ ye samjhā huuñ ḳhudī meñ to ḳhudā miltā nahīñ

ye kaisī chuuk huī be-ḳhudī meñ ham se ki bas
tamām umr musalsal azaab utrā thā

vo jo thī be-ḳhudī so hai maujūd
hijr se kam nahīñ visāl us kā

tum kyā ga.e ki zindagī be-kaif ho ga.ī
jab tak ki tum qarīb rahe be-ḳhudī rahī

abhī to gum-karda-rāh ḳhud haiñ mai-e-mohabbat kī be-ḳhudī meñ
agar kabhī aap meñ ham aa.e to us kī bhī justujū kareñge

hosh vāloñ ko ḳhabar kyā be-ḳhudī kyā chiiz hai
ishq kiije phir samajhiye zindagī kyā chiiz hai