Tags-Khudi

sātveñ dar tak pukār aa.ī ḳhudī ko be-ḳhudī
aur har dar se javāb aayā nahīñ haiñ ghar meñ ham

junūñ zāhir huā ruḳh par ḳhudī par be-ḳhudī chhā.ī
ba-qaid-e-hosh maiñ jab bhī qarīb-e-āstāñ pahuñchā

be-ḳhudī par shāyad us kā bas nahīñ
josh aa jaatā hai un ke naam se

sharāb-e-asr-e-nau meñ be-ḳhudī hai nai ḳhudī saaqī
jo tū ne aaj se pahle pilā.ī thī vahī mai lā

mil nahīñ saktā ḳhudā hai is ḳhudī ke saath meñ
ai dil is qaid-e-ḳhudī se jald-tar ab chhūT chhūT

ġhurūr-e-ishq ḳhudī aur ābrū-e-vafā
inheñ gañvā ke bahut kuchh bachā liyā maiñ ne

ḳhudā kyā ḳhudī ko bhī āvāz dī hai
musībat meñ kis ko pukārā nahīñ hai

ye iqrār-e-ḳhudī hai dāva-e-īmān-o-dīñ kaisā
tirā iqrār jab hai ḳhud se bhī inkār ho jaa.e

lazzat-e-zīst ba-har-taur sabhī ko hai aziiz
zahr-e-mīnā-e-ḳhudī bhī hai gavārā mujh ko

be-ḳhudī le uḌī havās kahīñ
hai koī dil ke ās-pās kahīñ

kyā sharm-e-ḳhudī kyā pās-e-hayā ġhurbat kī añdherī rātoñ meñ
kitne hī butān-e-zohra-jabīñ bā-dīda-e-nam bik jaate haiñ

mujh se kahā jo yaar ne jaate haiñ hosh kis tarah
dekh ke merī be-ḳhudī chalne lagī havā ki yuuñ

qadam kyā Dagmagā.eñge rah-e-ulfat meñ ai saaqī
bahut hī muḳhtasar sī be-ḳhudī hai aur bas maiñ huuñ

zindagī ke ā.īne kī aab hai 'hāmid' ḳhudī
apnī sāñsoñ se judā ehsās-e-ḳhud-dārī na rakh

paḌ ga.iiñ pairāhan-e-sub.h-e-chaman par silvaTeñ
yaad aa kar rah ga.ī hai be-ḳhudī kī ek shaam

is athāh khaa.ī se pattharoñ ko vahshat hai
be-ḳhudī kī vus.at se har ḳhudī pe dahshat hai

ayaañ thā be-ḳhudī se haal un kā
koī kyā pūchhtā vo kyā batāte

namāzī jā rahe haiñ aaj kyuuñ sū-e-sanam-ḳhāna
bahār-e-be-ḳhudī shāyad vahāñ bhī aa ga.ī hogī

ḳhudā pe apnī har ik baat Tālne vaale
ḳhudā se bhī zarā pahle ḳhudī zarūrī hai

sunī na dasht yā dariyā kī bhī kabhī maiñ ne
ki be-ḳhudī meñ guzārī hai zindagī maiñ ne