Tags-Khudi

ki ḳhirad kī fitnagarī vahī luTe hosh chhā ga.ī be-ḳhudī
vo nigāh-e-mast jahāñ uThī mirā jām-e-zindagī bhar gayā

zindagī-bhar ḳhudī kā paas rahā
ishq kab mahv-e-iltimās rahā

ġham-e-mohabbat ke ba.ad aatī hai sarhad-e-iltifāt-e-jānāñ
sharāb kī talḳhiyāñ sahoge to lazzat-e-be-ḳhudī milegī

har jumbish-e-nigāh meñ sad-kaif be-ḳhudī
bhartī phiregī husn kī niyyat kahāñ kahāñ

ḳhudī se be-ḳhudī kī jañg hai goyā mujhe is pal
muqābil apne hī apnī koī tasvīr rakhnī hai

sahar pā-e-gul be-ḳhudī ham ko aa.ī
ki us sust paimāñ meñ bū thī kasū kī

be-ḳhudī had se jo guzrī to maiñ ik roz 'nafas'
ghar se kyā niklā ki phir ghar pata kā bhuul gayā

lazzat meñ ḳhudī kī kho gayā hai zāhid
duur duur ḳhudā se ho gayā hai zāhid

ujālā karte tumhāre ghar meñ jo bas meñ hotā 'ġhazal' hamāre
duā hamārī hai umr saarī ḳhudī ko tum bā-kamāl rakhnā

kahāñ vo daur ki yak-gūna be-ḳhudī māñgeñ
surūr-e-ḳhud-nigrī kā zamāna aayā hai

nazar nazar aks rū-e-jānāñ nafas nafas be-ḳhudī kā aalam
hijāb yuuñ darmiyāñ se uTThā nazar milī yuuñ nazar se pahle

dil meñ vahshat jo nahīñ dasht-navardī kaisī
be-ḳhudī chhoḌ ke ab hosh meñ aayā jaa.e

ḳhudā ke naam pe duniyā ko lūTne vaale
ḳhudī kā dil meñ zarā ehtimām paidā kar

iḳhlās-o-vafā ke sajdoñ kī jis dar par daad nahīñ miltī
ai ġhairat-e-dil ai azm-e-ḳhudī us dar par sajda kyā ma.anī

ye kyā ki aap sirf parastish kareñ qubūl
ma.abūd-e-shahr merī ḳhudī bhī nibhā.iye

huī kāshif-e-haqīqat ye zamīr-e-mai-kada kī
mirī be-ḳhudī jo durd-e-tah-e-jām ban ke aa.ī

hue be-ḳhud to be-ḳhudī aa.ī
ḳhud-shanāsī huī ḳhud-ārā.ī

har ek gaam pe sajda yahāñ ravā hogā
ḳhudī kā daur hai har shaḳhs ab ḳhudā hogā

mast haiñ aur talab-e-jām huī jaatī hai
be-ḳhudī hosh kā paiġhām huī jaatī hai

sabhī ko baañT ke shakleñ ḳhudī rahe be-shakl
hamīñ akele musavvir the shahar meñ apne