Tags-Khudi

haath aa gayā hai jab se shu.ūr-e-ḳhudī kā saañp
siine pe loTtā hai ġham-e-zindagī kā saañp

ai be-ḳhudī Thahr ki bahut din guzar ga.e
mujh ko ḳhayāl-e-yār kahīñ DhūñDtā na ho

be-ḳhudī kūcha-e-jānāñ meñ liye jaatī hai
dekhiye kaun mujhe merī ḳhabar detā hai

shikast-o-reḳht zamāne kī ḳhuub hai 'maḳhdūm'
ḳhudī to TuuTī thī ḳhū-e-butāñ bhī TuuTī hai

kise nahīñ hai tamannā-e-sarvarī lekin
ḳhudī kī maut ho jis meñ vo sarvarī kyā hai

ai be-ḳhudī salām tujhe terā shukriya
duniyā bhī mast mast hai uqbā bhī mast mast

sar be-ḳhudī meñ aap ke qadmoñ pe jhuk gayā
aayā thā kuchh ḳhayāl sā dil meñ namāz kā

nigāh-e-mast ye meyār-e-be-ḳhudī kyā hai
zamāne vaale samajhte haiñ hoshiyār mujhe

shauq-e-sajda bandagī vāraftagī aur be-ḳhudī
mo'tabar sab us kī chaukhaT aur mere sar ke biich

be-ḳhudī meñ dekhtā huuñ be-niyāzī kī adā
kyā fanā-e-zindagī ḳhud husn ban jaane meñ hai

khulte haiñ jis se logoñ pe asrār-e-be-ḳhudī
merī kitāb-e-zīst kā vo baab aur hai

ye be-ḳhudī se bhī aage kī raah thī shāyad
jise pukārne nikle vo naam bhuul ga.e

ḳhud ko gum kar ke DhūñDiye us ko
ye guhar be-ḳhudī se miltā hai

kaifiyat hī kaifiyat meñ ham kahāñ tak aa ga.e
be-ḳhudī vo thī ki un ke āstāñ tak aa ga.e

bahut mushkil hai is me.aar kī rindī zamāne meñ
jo laġhzish ko gunah aur be-ḳhudī ko zindagī samjhe

nahīñ haTtī nazar anjām-e-ālam se nahīñ haTtī
use koī ḳhudī gardān le yā be-ḳhudī samjhe

rumūz-e-be-ḳhudī samjhe na asrār-e-ḳhudī samjhe
baḌī shai hai agar apnī haqīqat aadmī samjhe

the be-ḳhudī meñ paas vo hosh aa.ī to ga.e
chūke ġhazab hī hosh meñ aanā yahāñ na thā

ye sher-goī vo ḳhud-farāmosh kaifiyat hai jahāñ ḳhudī kā guzar nahīñ hai
ḳhudī kī bāz-āvarī se pahle jo be-ḳhudī kī ḳhud-āgahī hai vo shā.irī hai

tere phal-phūl dahkī huī āgahī
āgahī se numū aur numū se ḳhudī