Tags-Khudi

chashm-e-sāqī se piyo yā lab-e-sāġhar se piyo
be-ḳhudī āThoñ pahar ho ye zarūrī to nahīñ

be-ḳhudī aap talak laa.ī thī
so vahī laa.e ga.ī hai mujh ko

ḳhudī meñ gum hai ḳhudā.ī talāsh kar ġhāfil
yahī hai tere liye ab salāh-e-kār kī raah

na hai sitāre kī gardish na bāzi-e-aflāk
ḳhudī kī maut hai terā zavāl-e-nemat-o-jāh

ho salāmat mirā ishq josh-e-junūñ husn ke raaz ḳhud munkashif ho ga.e
itnī mushkil nahīñ rahguzār-e-fanā be-ḳhudī chāhiye āgāhī ke liye

chhoḌā nahīñ ḳhudī ko dauḌe ḳhudā ke pīchhe
āsāñ ko chhoḌ bande mushkil ko DhūñDte haiñ

hai zikr-e-yār isī iltizām se rañgīñ
mahaktā jism javāñ raat be-ḳhudī bārish

qaid-e-ḳhudī meñ aadmī insāñ na ho sakā
zarra simaT gayā to bayābāñ na ho sakā

jāñ-ba-lab lamha-e-taskīñ mirī qismat hai 'shamīm'
be-ḳhudī phir mujhe dīvāna banātī kyuuñ hai

be-ḳhudī tujh pe tasadduq hoñ mire hosh-o-havās
sāmne hote hue un ko pukārā bhī gayā

kahtī hai un kī mastī hosh aa.e to maiñ pūchhūñ
ai be-ḳhudī batā de is vaqt maiñ kahāñ huuñ

aaj insān huā makr-o-daġhā kā daftar
qalb-e-zardār hai ehsās-e-ḳhudī kā ḳhūgar

ham ko mālūm be-ḳhudī apnī
phir bhī sahrā meñ chal rahe haiñ ham

jis kuuñ mulk-e-be-ḳhudī kā raaj hai
hai zamīñ taḳht aur bagūlā taaj hai

uThnā chāheñ to girā detā hai phir Thokar se
be-ḳhudī chāheñ to hone bhī nahīñ detā hai

muztarib huuñ ab ye jī kī baat hai
afv kiije be-ḳhudī kī baat hai

be-ḳhudī meñ mahv-e-nazzāra the ham kyuuñ chauñk uThe
haa.e vo apnā maze kā mashġhala jaatā rahā

azal meñ ik tajallī se huī thī be-ḳhudī taarī
tumhīñ ko maiñ ne dekhā thā kuchh aisā yaad hotā hai

maiñ naqd-e-jāñ tak luTā chukī thī nafas meñ sho.ale jalā chukī thī
tilism-e-ḳhvāb ab kahāñ se aayā ye manzil-e-be-ḳhudī na.ī hai

mai-e-be-ḳhudī kā saaqī mujhe ek jur.a bas thā
na kabhī nasha utartā na kabhī ḳhumār hotā