Tags-Khushi

milne kī kuchh ḳhushī na bichhaḌne kā ḳhauf hai
ai merī jaan tū baḌī tāḳhīr se milā

laa.ī hayāt aa.e qazā le chalī chale
apnī ḳhushī na aa.e na apnī ḳhushī chale

ahbāb ye tum kahte ho bajā vo bazm-e-adū meñ baiThe haiñ
vo aa.eñ na aa.eñ un kī ḳhushī charchā to karo mar jaane kā

jannat meñ piyegā kyūñkar ai shaiḳh yahāñ gar mashq na kī
ab maane na maane terī ḳhushī hai kaam mirā samjhāne kā

aaj zulmat ke chehre par hai nuur
un kā ġham bā.is-e-ḳhushī to nahīñ

ġhamoñ ke saare parinde hī is pe aa baiThe
ḳhushī kī rut meñ zarā sā jo dil harā huā hai

qanā.at kā ye aalam hai ki musht-e-ḳhāk ke badle
javāhar ko bhī miTTī meñ ḳhushī se rol saktā huuñ

terī āvāz sun ke jaag uThī
ek rūThī huī ḳhushī mujh meñ

tamām umr isī rañj meñ tamām huī
kabhī ye tum ne na pūchā tirī ḳhushī kyā hai

mujhe ḳhabar nahīñ ġham kyā hai aur ḳhushī kyā hai
ye zindagī kī hai sūrat to zindagī kyā hai

hai vāda-e-visāl-e-sanam kī vo sarḳhushī
har shai hasīn ab mirī fikr-o-nazar meñ hai

tumhārī raah meñ chalne kī hai ḳhushī aisī
ki saath naqsh-e-qadam bhī uchhal uchhal ke chale

kyā kyā ḳhushī thī va.ada-e-māh-e-tamām kī
ghar ko bhisht-zār banāyā thā shaam ne

surḳh aahan par Tapaktī buuñd hai ab har ḳhushī
zindagī ne yuuñ to pahle ham ko tarsāyā na thā

chalo sabīl kareñ us ko jā manāne se
ḳhushī ko giit mayassar nahīñ zamāne se

hañsī meñ kaTtī thiiñ rāteñ ḳhushī meñ din guzartā thā
'kañval' maazī kā afsāna na tum bhūle na ham bhūle

ġharaz vo din ki jab mire chaman meñ ik bahār thī
ġharaz vo din ki jab ḳhushī mire liye siñgār thī

phir aane kī havas meñ sahar kis ḳhushī ke saath
hamrāh-e-nāla dard-e-jigar bhī ma.an huā

mere ghar koī ḳhushī aatī to kaise aatī
umr-bhar saath rahā dard mahājan kī tarah

ḳhushī kā din to baḌī minnatoñ se bantā hai
udāsiyoñ ke magar haiñ bane-banā.e din