Tags-Khushi

tirī raah meñ tirī chaah meñ ye maqām kaun sā aa gayā
ki ḳhushī kī mujh ko ḳhushī nahīñ na malāl hī kā malāl hai

mirī zindagī kā hāsil tire ġham kī pāsdārī
tire ġham kī aabrū hai mujhe har ḳhushī se pyārī

maiñ baḌh rahā huuñ udhar yā vo aa rahā hai idhar
vahī ḳhushī vahī ḳhushbū havā meñ raushan hai

mirī ḳhushī kā vo kyā kyā ḳhayāl rakhtā hai
ki jaise merī tabī.at se āshnā hai bahut

ajab laḌkī hai
aa.e to ḳhushī kī tarah aatī hai

idhar-udhar ke kināre mujhe bulāte haiñ
magar maiñ apnī ḳhushī se bhañvar meñ rahtā huuñ

ham aur chaah ġhair kī allāh se Daro
milte haiñ tum se bhī to tumhārī ḳhushī se ham

qabā-e-dard jab se zeb-e-tan hai
ḳhushī ko apne andar dekhte haiñ

aise nagar meñ merā muqaddar huā muqīm
jis meñ ḳhushī ke diip jalā.e na jā sake

rāhat kī justujū meñ ḳhushī kī talāsh meñ
ġham pāltī hai umr-e-gurezāñ na.e na.e

tumhāre naam kar baiThe dil-o-jāñ kī ḳhushī sāhab
hasīn-o-dil-nasīñ lagtī hai ab to zindagī sāhab

ġham aur ḳhushī meñ farq na mahsūs ho jahāñ
maiñ dil ko us maqām pe laatā chalā gayā

rañj o ḳhushī kī sab meñ taqsīm hai munāsib
baabū jo hai to phir kyā chañgez hai to phir kyā

ḳhushī hai apnī na koī malāl hai apnā
vo be-dilī hai ki jiinā muhāl hai apnā

go ye ġham hai ki vo habīb nahīñ
par ḳhushī hai koī raqīb nahīñ

mil ke baiTheñge ḳhushī aur ġhamī meñ saare
jaarī rakheñge mohabbat kī ye ḳhū gaañv meñ

ye be-sabab nahīñ aa.e haiñ aañkh meñ aañsū
ḳhushī kā lamha koī yaad aa gayā hogā

ġham ko sabāt hai na ḳhushī ko qarār hai
jo kal thā ḳhanda-rez vo aaj ashk-bār hai

sarḳhushī ab bhī tamāshā.ī hai maiḳhāne meñ
is sitamgar ko to shīshe meñ utāro logo

shahādat kī ḳhushī aisī hai mushtāq-e-shahādat ko
kabhī ḳhanjar se miltā hai kabhī qātil se miltā hai